“Ami kontinua aktividade ne’ebe hala’o ona iha tinan lima liu ba hanesan kapasitasaun rekursu humanos iha areas oi-oin haruka ba eskola, formasaun kapasitasaun ne’ebe relasiona ho igualidade jeneru no mos implementasaun planu asaun nasional violensia bazeia ba jeneru, implementasaun lei kontra violensia domestika liu –liu sosializasaun ba komunidade,” dehan SE Idelta Maria Rodrigues, (15/01), hafoin aprezenta sira nia proposta orsamentu ba Komisaun F Parlamentar, iha Parlamentu Nasional.
Sekretaria Estadu hatutan, Sekretaria Estadu Promosaun Igualidade (SEPI) mos sei kapasita membru Grupu Trabalhu Jeneru iha kada instituisaun governu nian iha nivel nasional no distritu inklui sosiedade sivil kona ba halo analiza ba ezekusaun orsamentu iha ministeriu hotu.”benefisiariu sira husi orsamentu ne’e hetan duni igualidade entre feto no mane,”.
Iha OJE tinan 2012 SEPI propoin deit $1.377 milioens, no konsege ezekuta 91 pursentu hodi hala’o atividade apoiu feto iha vida ekonomia hanesan transferensia publikas, implementasaun lei violensia domestika no seluk tan.
Entretantu Prezidente Komisaun F ne’ebe trata asuntu Iqualidade Jeneru, Saúde, Edukasaun, Deputadu Virgilio Hornai dehan, kada tinan SEPI nia orsamentu ki’ik liu (0.10% deit) kompara ho sira seluk tanba halo operasional deit.
“Maibe ami nia preokupasaun mak orsamentu tenke preve ba edifisio, fasilidade transporte no rekursu humano, realidade iha diresaun inspesaun geral, diretor deit laiha staf, ami husu ba funsaun publika atu aselera prosesu rekrutamentu funsionarios iha ministerio sira ne’e liu –liu SEPI,” Prezidente Komisaun F ne’e sujere.
