“iha 2013 ami sei hadia dalan iha timor laran tomak, ita hadia tanba iha 2013 ne’e ita iha osan duni no ita sei uja metode foun atu liu liu atu halai liu ba iha estrutura dalan ninian, tanba dalan iha timor laran ne’e nia estrutura ladiak,” dehan Secretariu Estadu Obras Publiko Luis Vas Rodrigues, iha Parlamentu Nasional, foin lalais.
Nia mos hatutan katak, ne’e duni waihira implementa estrutura ne’e, komonidade sei hetan mos estrada nebe maka ho kualidade diak.
“ida ne’e ita bele garante katak ninia dasar ne’e subsiente ona par atu ita nahe aspal, nebe wainhira nahe aspal nia estrutura ne’e tenke diak uluk lai” dehan Secretariu Estadu Rodrigues.
Iha tinan 2012 mesmu la estrada hotu-hotu seidauk maibe MOP komesa resolve ona balun, nebe iha fatin balun komonidade sira komesa asesu ona ba estrada.
Iha lidun seluk deputadu Estanislau da Silva hateten, ne’e planu nebe maka diak tanba povu nebe persija estrada nebe diak hodi halo’o sira nia aktividade lorloron nian.
“ita hare deit tanba iha 2013 ne’e sei aloka osan ba ida ne’e, ne’e duni espera katak iha tinan oin mai ne’e estrada iha teritoria tomak bele diak hotu” dehan deputadu Estanislau da silva, iha PN, foin lalais ne’e.
Tuir nia to’o ona tempu povu ne’e asesu estrada nebe maka diak no kualidade, tanba ita ukun an ona iha tinan 10 nia laran, maibe povu sei halerik nafatin konaba estrada.
