Laboratorium forensik Servisu Investigasaun Criminal (SIC) sei funsiona ho diak iha tinan ne’e tanba fasilidades ne’ebe maka presiza agora dadaun kompleta ona.
“Agora hein deit atu instala sasan sira ne’e, tanba wainhira atu uza sasan hirak ne’e presiza instala atu hala’o nia funsaun iha laboratorium,” dehan Diretor SIC, Superintendente Calisto Gonzaga, (07/01), iha Kaikoli, Dili.
Kona ba aimoruk, tuir nia, laiha problema tanba SIC koopera hamutuk ho nasaun balun ne’ebe maka sei ajuda iha parte aimoruk.
“Aimoruk ne’e ladun difisil , ita bele kompleta tanba ami iha ligasaun ho nasaun visinhu sira” dehan Diretor SIC ne’e.
Iha lidun seluk tuir Deputada Albina Marcal katak, SIC presiza duni laboratorium ida nune’e bele fasilita sira nia servisu ho diak.
“Laboratorium ne’e importente teb-tebes tanba sira nia servisu ne’e halo investigasaun ba criminal, atu indentifika buat ida presiza laboratorium atu nune’e bele hetan rezultadu ne’ebe maka diak,” dehan Deputada ne’e.
