Administrador Distritu Ainaro, Manuel Ramos, senti orgolho tanba eletrisidade iha Distritu ne’e lakan durante 24 oras e komunidade sira mos kontente maske foin lakan deit iha Ainaro vila.
“Sira seluk seidauk tanba instalasaun seidauk hotu no la’o hela, maibe ami kontente tanba ahi lakan 24 oras,” hateten Administrador Distritu Ainaro, Manuel Ramos, iha serimonia inagura Sub-estasaun Eletrika iha Suku Casa, Distritu Ainaro, foin lalais ne’e.
Kona ba komunidade sira ne’ebe seidauk asesu ba eletrisidade, husu atu hein oituan tanba instalasaun agora dadaun la’o hela.
“Hau ho PNTL sei kordena hamutuk para servisu la’o diak nafatin e populasaun sei la ba ganggu PLN tanba ahi lakan ona 24 oras,” Administrador Ainaro tenik.
Alende ne’e Sekretariu Estadu Eletrisidade,Januario Pereira informa katak, eletrika iha Sub-estasaun Casa ne’e mai husi Sentral Eletrika Hera nian hodi fornese ahi ba komunidade Distritu Ainaro no Same.
“Sentral Eletrika Betano seidauk remata,”.
Tuir nia, antes fin do ano tama ba Natal, husi Hato-Udu sae ba Same tesik ba to’o Suai bele asesu ona ahi husi Sentral Eletrika Hera.
“Ne’ebe favor ida fo apoiu nafatin fatin ne’ebe imi hatudu ona, sei tesi ita bo’ot sira nia nuu, ai, kulu, has, ida ne’e hatudu ita bo’ot sira nia boa vontade oinsa atu bele kopera hodi dezenbolve rai ne’e,” SE Pereira katak.
Iha fatin hanesan Komunidade Suku Casa, Norberto da Costa lamenta tanba sira nia suku seidauk hetan ahi.
“Tuir lolos ami mak hetan uluk ahi mak ba to’o iha vila, maibe agora ami iha Suku Casa seidauk asesu ba ahi, sira iha vila asesu uluk tiha ona,” lamenta Komunidade Suku Casa ne’e.
Nia lamenta tanba durante iha prosesu estabelesemntu sub-estasaun eletrika ne’e, komunidade Casa fo apoiu tomak ba enerjia eletrika ne’e e to’o ikus remata komunidade refere la hetan benefisiu husi ahi ne’e.
