Operasaun ba patrimonio estadu ne’e hala’o bazea ba mandatu husi Primeiru Ministru Kay Rala Xanana Gusmao ba PTN atu prende tiha kareta no motor estadu ne’ebe halo operasaun la tuir nia funsaun hanesan loron Sabadu no Domingu.
“Ami prende motor 11 no kareta 11, kareta no motor sira ne’e balun laiha guida de marcha, no balun laiha karta kondusaun no balun la lori dokumentus, kuaze kareta no motor ne’e, sira atu uza ba Distritu,” dehan Komandante Tranzitu Nasional, Inspector Xefe Antonio L.C. Soares, iha Kaikoli, Dili.
Tuir nia, operasaun ne’e hala’o iha postu hat ne’ebe maka estrategiku ho intensaun atu hatene kareta ou motor sira ne’e uza duni ba interese privadu.
“Ami buka dalan ne’ebe maka atu ba distritu nian ne’e, hanesan Tasi Tolu, Marabia, Kristu Re’i iha Fatu-Ahi, ami hala’o iha oras tuku tolu lokraik to’o tuku hitu kalan, iha tempu ne’ebe funsionariu sira uza ba distritu ba interese privadu nian sira ba Sesta, Sabadu ou Domingu mak fila,” Komandante PNT ne’e tenik.
Iha lidun seluk Deputadu Agustino Lay hateten, ne’e asaun ne’ebe maka diak, tanba dala barak iha kareta estadu balun la’o tuir duni nia dalan, maibe balun mos la’e, tanba ne’e sira ne’ebe halo hahalook hanesan ne’e tenke implementa sansaun ba sira.
“Atu nune’e bele kontrola membru governu sira atu bele utiliza sasan hirak ne’e ba servisu nasaun nian, la’os ba fali interese privadu,” dehan Deputadu Lay.
Husu ba Polisia atu aktividade ne’e bele hala’o iha kada semana rua halo dala ida, atu nune’e bele kontrola hela deit ba funsiunariu ne’ebe nakar.
