Sekretaria Estadu Promosaun Igualidade (SEPI) nafatin fo ondra ba heroina sira ne’ebe sakrifika sira nia an to’o mate ba libertasaun rai no povu ida ne’e, liu husi selebrasaun loron nasional ba feto, nune’e bele fo motivasaun ba feto maluk sira atu banati tuir.
“Hau hanoin atu hare ba heroina sira, ita presiza servisu hamutuk ho Ministeriu Solidaridade Sosial (MSS) tanba siramak implementa e to’o ohin loron ita nafatin fo omenagen ba ita nia heroina sira ne’ebe libertadora ba indepedensia ida ne’e, feto sei la haluhan ba sira nia luta hau hanoin feto sei kontinua nafatin hatutan aten brani ne’ebe sira halo ona iha tempu ida ita sei hare mais ida ne’e presiza prosesu ne’ebe naruk la’os fasil,” dehan SE, Idelta Maria Rodrigues, iha Sentru Konvensaun, Dili.
Kona ba karik Governu sei hari estatua ruma ba heroina sira ne’e, SE Rodrigues dehan, presiza tempu naruk no kolaborasaun ne’ebe diak ho entidade hotu ne’ebe relevante nune’e buat hotu bele hala’o ho susesu.
Entretantu Prezidente Grupu Feto Parlamentar Timor-Leste (GMPTL), Deputada Josefa Alvares Soares rekonese katak, Governu iha duni programa ida atu dignifika heroi ne’ebe fo sira na vida ba nasaun ida ne’e liu husi tau monumentu, kondekorasaun maibe ba heroina (feto) sira seidauk iha.
“Kona ba heroina sira memang laiha duni, ita seidauk hare temi deit naran tanba estadu seidauk fo espesial atensaun ba sira so Parlamentu Nasional mak fo loron nasional feto nian ne’ebe tau naran Maria Tapo, maibe sei iha heroina Rosa Mukit Bonaparte hanesan Primeira Sekretaria Jeral ba OPMT, ida seluk mak Maria Gorete e la’os deit sira ne’e, sei barak hanesan heroina sira ne’ebe hetan violasaun seksual no seluk tan antes tiru mate iha akontesementu 12 de Novembru 1991,” dehan Deputada ne’e.
Tuir nia, Estadu Timor-Leste presiza identifika heroinas nian kada Distritus atu bele fo kondekorasaun, tau data ruma iha kalendario nasional nian kona ba sira nia loron no halo mos sira nia estatua ruma atu harii iha jardin sira ne’ebe iha fatin publiku atu hatudu ba ema hotu katak la’os mane deit mak luta ba libertasaun maibe feto mos.
