Iha 04 Outobru 2012 Tribunál Distritál Baucau (TDB) hala’o julgamentu ho ajenda leitura akordaun ba kazu krime abuzu seksuál ne’ebé julga ho Númeru Prosesu: 21/Crm.C/2012/TDB. Kazu ne’e involve arguidu Inocencio L. Guterres hasoru vítima Ana Maria Viana ne’ebé hanesan arguidu nia aluna, ne’ebé akontese iha 28 Setembru 2010, iha Suku Samalari, Sub-distritu Baguia, Distritu Baucau.
Leitura akordaun prejide husi juiz singular Dr. José Gonsalves, Ministériu Públiku reprezenta husi Dra. Benvinda da Costa do Rosario no arguidu hetan defeza husi Dr. Grigorio de Lima husi Eskritoriu Defensória Públiku.
JSMP simu ho haksolok ba pena ne’ebé tribunál aplika ba arguidu, tanbá pena ne’e refleta duni aktu ne’ebé arguidu komete no ne’e sai hanesan lisaun ida atu ema hotu konsenti no iha futuru labele komete aktu hanesan, dehan Luis de Olivera Sampaio, Diretór Ezekutivu Judycial Sistem Monitoring Program (JSMP, foin lalais ne’e.
Ministériu Públiku akuza arguidu nu’udar autór material ba kríme abuzu seksuál ba menór ne’ebé preve iha artigu: 177 Kódigu Penál hasoru vítima. Iha audensia julgamentu tribunál konvensidu katak arguidu provadú komete krime abuzu seksual hasoru vítima.
Iha akuzaun haktuir katak 28 Setembru 2010 kalan, arguidu ba iha vítima nia fatin, kolu tiha vítima nia ropa, ameasa vítima no ho forsa no violensia obriga vítima atu halo relasaun seksual ho arguidu. Mezmu nune’e iha julgamentu arguidu nega total faktu ne’ebé akuza ba nia.
Depois de avaliasaun ba provas no sirkunstansia asosiadu husi kazu ne’e, ikus mai tribunál konklui no aplika pena prizaun tinan 10 ba arguidu.
Entretantu Deputadu Natalino dos Santos, hateten, saida maka Tribuanl foti ne’e bazeia duni ba factus no evidensia ne’ebe maka iha.
“Ne’e funsionamentu Tribunal nian, ne’e duni desizaun ne’ebe maka tribunal foti ne’e desizaun ne’ebe maka tuir duni saida maka akontese, tanba wainhira foti desizaun hanesan ne’e liu husi prosesu ne’ebe maka naruk, pur ezemplu tenke rona mos declarsaun husi testamunha sira no evidensia seluk tan ne’ebe maka hatudu katak arguidu halo duni aktu ne’e, ne’e maka juis foin foti desizaun,” dehan Deputadu dos Santos.
