Iha kompetisaun diskursu kona ba loron Demokrasia Internasional ne’ebe partisipa husi Estudante husi Eskola Sekundariu hitu husi Distritu hitu, iha ne’ebe sira ida-idak hato’o sira nia diskursu, e ikus mai Estudante Marcelo da Costa husi Eskola Sekundariu Koni Santana husi Distritu Lospalos mak sai vensedor (primeiru lugar).
Konkorentes sira,liu-liu sira ne’ebe hetan juara simu rezultadu ne’e ho kontente no haksolok tanba esforsu ne’ebe halo durante ne’e hetan duni rezultadu diak.
“Hau kontente tebes tanba hau hetan primeiru lugar hafoin kompete ho hau nia maluk sira husi distritu seluk e hau nia esforsu durante ne’e iha eskola la saugati,” dehan Konkorente primieru lugar ne’e ho kontente.
Iha mos premiu ne’ebe konkorente sira simu mak, primeiru lugar hetan osan $400, II lugar $300 estudante Juvelino Deogratia C.de Jesus husi Eskola Sekundaria Ave Maria Suai, terseiru lugar hetan $200 estudante Adencia Antonio Maria husi Eskola Sekundaria Publiku numeru 02 Vila Nova Baucau.
Estudante da Costa dehan, antes juri anunsia rezultadu husi konkorsu ne’e, nia sente laran taridu e la espera katak nia mak hetan primeiru lugar iha kompetisaun ne’e.
“Ida ne’e esperiensia ne’ebe diak ba hau, hau fila ba sei hatudu ba hau nia maluk estudante sira iha distritu Lospalos,” estudante da Costa dehan.
Kompetisaun ne’e realiza tanba servisu hamutuk entre Ministeriu Edukasaun ho Misaun Integradu Nasoens Unidas iha Timor-Leste (UNMIT) ho objetivu atu selebra loron Demokrasia Internasional ne’ebe monu 15 fulan Setembru foin lalais ne’e.
Enkuantu Eskola Sekundaria hitu ne’ebe kompete iha kompetisaun ne’e mak hanesan, Eskola Sekundaria Koni Santana husi Distritu Lospalos, Eskola Sekundariu Vila Nova Baucau, Eskola Sekundaria Baque husi Distritu Oe-cusse, Eskola Sekundaria Ave Maria husi Covalima, Eskola Tekniku Ekonomia no Komersiu husi Distritu Liquisa, Eskola Sekundaria Publiku Distritu Aileu no Eskola Sekundaria Distritu Ermera.
Entretantu Konkorente Manuel Baptista Sarmento, husi Eskola Sekundaria Aileu,Manuel Batista Sarmento ne’ebe lakon iha konkorsu ne’e dehan, maske nia la hetan juara, maibe kontente tanba brani hodi halo kompetisaun ho maluk sira seluk.
“Lakon ga manan laiha problema, e hau sente kontente tanba hau mos bele hato’o ona hau nia esperiensia ba iha partisipante sira iha kompetisaun diskursu ne’e,” Estudante Sarmento fo korajen aan.
Estudante ne’e promete katak ba oin nia sei prepara aan diak liu tan, aprende no aprende hodi hein oportunidade seluk ne’ebe tuir mai.
“Tanba Ida ne’e foun ba hau, hau grogi oituan atu hato’o hau nia diskursu,” dehan Estudante ne’e ho onestu.
Iha fatin hanesan, Reprezentante UNMIT iha Timor-Leste, Ken Inove fo agradese ba konkorente sira ne’ebe partisipa ona iha konkorsu ne’e, maske balun tenke lakon.
“Hau hakarak kongratula ba manan nain sira iha kompetisaun ida ne’e, ne’ebe mak ita bo’ot sira hato’o tiha ona diskursu ne’ebe extra ordinariu,” kongratula Reprezentante UNMIT iha Timor-Leste ne’e.
Nia hatutan, liberdade espresaun nudar prinsipiu demokrasia, tanba ne’e mak desde 2010 UNMIT ho Ministeriu Edukasaun promove tiha ona valor sira ne’e liu husi kompetisaun diskursu.
“Povu iha rai ida ne’e hatudu ona ba mundu tomak katak, demokrasia buras dadauk ona iha nasaun ida ne’e, ezemplu mak eleisaun Prezidensial no eleisaun Parlamentar halo ho susesu, ne’e progresu bo’ot ida ba nasaun ne’ebe mak foin hetan independensia iha tinan 10 liuba,” reprezentante UNMIT ne’e gava.
