Familia Ian Melrose husi Australia fo apoia finanseira ho montante $100.000 resin ba Organizasaun Hiam Health (HH), atu nune’e bele atende labarik ho kondisaun mal nutrisaun ne’ebe durante ne’e hela iha Sentru Rehabilitasaun HH ne’e ho diak.
Tuir Diretora HH, Rosaria Martins da Cruz katak iha fulan Maiu tinan ne’e sira taka tiha ona Sentru Rehabilitasaun HH tanba falta de orsamentu.
“Ami sei loke iha Janeiru 2013, e durante fulan hirak nia laran ne’e ami sei halo evaluasaun ida ho funsionariu Hiam Health nian hodi hare fali husi inisiu to’o iha taka sentru ne’e, iha buat ruma ne’ebe diak dezenvolve diak liu tan, ida ne’ebe fo impaktu ba ami nia sentru taka derepente ami sei hadia,” dehan Diretora Ezekutivu HH, Rosaria Martins da Cruz, iha Aimutin, Dili.
Diretora ne’e afirma, Ian Melrose hanesan ema negosiante ida (nain husi Optical Superstores iha Australia) ne’ebe iha interese no hakarak loke fali Sentru Rehabilitasaun ne’e.
Atu labele akontese tan esperiensia aat ne’e iha futuru, Diretora ne’e hatutan, sira sei halo planu estratejia ida diak ,liu-liu bainhira halo rekrutamentu foun ba staf sira.
“Sei intervista, fo job description ida klaru ba funsionariu sira, atu nune’e sentru rehabilitasaun ne’e loke to’o mal nutrisaun iha Timor-Leste laiha,” Diretora ne’e informa.
Nia dehan, labarik ho kondisaun mal nutrisaun ne’ebe alta husi sentru rehabilitasaun HH hafoin sentru taka sira nia kondisaun diak hotu,so ke sira ne’ebe la’os kliente klaru sira nia kondisaun seidauk diak.
Nia informa, fulan ida sira gasta osan ba atividade Sentru Rehabilitasaun no ba atividade edukasaun, agrikultura, evaluasaun no monitorizasaun inklui mos salariu funsionariu (staf 45 Timor oan) ho montante $16 mil.
Entretantu Komunidade Matilda Amaral hateten, prezensa Sentru Rehabilitasaun ne’e importante tebes, nune’e labarik minoridade tinan 5 mai kraik ne’ebe afeta mal nutrisaun bele rekopera fali sira nia kondisaun bainhira fila husi Hospita tanba Timor seidauk iha sentru espesifiku ba mal nutrisaun.
“Hau hanoin prezensa sentru rehabilitasaun ne’e importante tebes tanba tuir informasaun ne’ebe ami rona Timor-Leste iha numeru mal nutrisaun ne’ebe aas liu-liu ba labarik sira,” dehan Komunidade Amaral.
