“Labarik minoridade hamutuk na’in 21 mak agora dadaun iha prizaun Becora, husi numeru ne’ebe iha nain ida hetan ona desizaun maibe estatus medida seguransa tanba sofre moras mental, nain sia prizaun preventive hein prosesu rekolha evidensia no julgamentu iha tribunal nain 10 hetan ona desizaun ikus ho pena prizaun ne’ebe la hanesan,” dehan Project Manager Organizasaun Forum Tau Matan (FTM), Honorio Almeida], iha Kaikoli, Dili.
Nia esplika, labarik minoridade (tinan 14 ba leten) ne’ebe iha prizaun komete krime la hanesan, iha balun komete krime omesidu, sunu uma, asaltu seksual, na’ok no seluk tan, iha balun hetan ona desizaun ikus maibe ho sofre moras mental Tribunal deside tenke hela iha prizaun.
Iha parte seluk Vise Ministru Justisa, Ivo Valente hateten durante ne’e ministeriu tau labarik minoridade sira (16-21) ne’ebe komete krime iha sela espesial ida no hetan tratamentu espesial la hamutuk ho ema adultu tanba ne’e kompetensia ministeriu nian.
“Sira ne’ebe moras mental Ministerio Justisa servisu ho parseirus seluk ne’ebe toma konta ba psikologia nian, atu bele ba iha prizaun hodi fo bimbingan rohani, bimbingan psikologia ba sira kada semana no guarda prizoneirus sira mos hetan formasaun no kapasitasaun atu fo atendimentu ba ema ne’ebe sofre moras mental,” Nia tenik.
Nia mos husu ba Guarda Prizoneirus sira labele hatene deit halo seguransa maibe tenke hatene mos fo atendimentu ne’ebe diak ba sira ne’ebe sofre moras mental.
Nia hatutan,sira tenke auguenta atu halo tratamentu iha prizaun no tenke tuir prosesu julgamentu, tanba ne’e desizaun tribunal nian e ministeriu laiha poder atu halo interven ba desizaun tribunal nian maibe tribunal mos sei hakruk ba Lei Kodigu Penal.
