Hafoin hetan pasu positivu hodi promove igualidade jeneru iha kada ministerial no sekretarial durante tinan lima nia laran, Primeiru Ministru autoriza Sekretaria Estadu Promosaun Igualidade (SEPI) bele hola parte iha Komisaun Revizaun ba Orsamental (Budget Committee Review) ne’ebe sei halo revizaun ba programa no planu orsamentu ne’ebe kada ministeriu sira sei aprezenta.
“Ami bele sertifika tama iha Budget Committee Review hodi hare direitamente, se hau hare ministeriu ida laiha programa no planu orsamentu ba igualidade jeneru, hau sei fo komentariu no haruka ba hadia, ida ne’e mak ita sei introdus iha tinan oin mai iha programa V Governu Konstitusional tomak,” dehan SE Idelta Maria Rodrigues, fulan kotuk bainhira partisipa iha aprezentasaun programa V Governu Konstitusional, iha Parlamentu Nasional.
Enkuantu Komisaun ne’e rasik lidera husi Primeiru Ministru, Xanana Gusmao ho Ministeriu ne’ebe sira hili hodi involve komisaun ne’e.
Nia dehan, SEPI iha ona hanoin atu perkore Ministru no Sekretariu Estadu foun sira inklui Tekniku sira atu halo introdusaun ba sira kona ba programa igualidade jeneru ne’ebe sira sei halo ba orsamentu Jeral 2013 nian.
Iha sorin seluk Deputada Josefa Alvares Soares hateten ho prezensa SEPI iha Komisaun ne’e hanesan pasu pozitivu ida atu implementa orsamentu sensivel ba jeneru no promove igualidade jeneru iha rai laran, maibe tenke bazea ba estudu viabilidade, nune’e bele susesu.
“Hau hanoin sira bele halo ida ne’e ba maibe kuandu seidauk iha estudu viabilidade ida diak atu aplika osan ida ne’e, hau hanoin susar atu sira implementa programa no planu sira ne’e ho diak,” dehan Deputada Soares.
