“Implementa mos ba domestic worker salariu minimu ne’e, maibe la hanesan tanba sira balun hela iha empregadas sira nia uma, katak sira nia nesedidade baziku ne’e majikan sira mak fo entaun sira iha akordu privadu ida entre trabalhador ho uma nain,” dehan Diretor Geral SEPFOPE, Jacinto Gusmão, (19/09), iha Kaikoli, Dili.
Diretor Jeral ne’e esplika, ema ne’ebe iha direitu klaru atu hetan Salariu Minimu ne’e mak ema ne’ebe servisu durante oras ualu (8) nia laran kada loron, maibe se servisu tuir tempu deit sei la hetan.
Maibe tuir nia,dala barak mos akontese ba trabalhador domestika sira ne’ebe hela iha uma no halo servisu iha uma laran, ema la konsidera no la simu salariu minimu ne’e.
Enkuantu Diretor Inspesaun Geral do Trabalhu, Aniceto Leto Soro, husu ba Diomestik Worker sira atu hato’o keixa ba Diresaun Inspesaun Jeral nian, bainhira patraun la selu tuir salariu minimu ne’ebe determina ona.
Iha parte seluk Sekretariu Geral Konfederasaun Sindikatu Timor-Leste (KSTL), Rigoberto Monteiro hateten iha Lei Kodigu Trabalhu laiha artigu espesifiku ida hodi regula domestic workers sira nia direitu, tanba ne’e difisil oituan.
“Desizaun ne’ebe dewan sira halo kona ba salariu minimu ne’e la klaru, entaun nia implementasaun agora ne’e sai konfuzaun bo’ot ida tanba iha lei kodigu laboral la kobre domestic workers nia direitu, maibe iha parte seluk domestic workers hanesan mos trabalhadores ida,” dehan SJ.KSTL Monteiro.
Iha parte seluk Diretora Rede Feto, Jacinta Luzinha husu governu atu klarifika no halo esplikasaun lolos kona ba implementasaun SM ne’e, liu-liu direitu ba Domestik Worker sira nune’e labele hamosu konfuzaun iha publiku nia le’et.
“Iha ema barak mai husu ami kona ba standar salariu $115, e sira dehan durante ne’e ”ami simu $50 deit” ne’ebe hau hanoin presiza hare didiak trabalhu domestika no trabalhu sira seluk nia direitu,” sujere Diretora Ezekutivu RF ne’e.
