“Ami simu Radio Head set 420 no Radio Bis 110 husi SES, maibe la konsege programa ho diak tanba iha radio head set ne’e baterai bo’ot liu fali nia radio, enkuantu radio bis ne’e labele connect ho radio ne’ebe maka PNTL ejiste ona, tanba ne’e maka hau aprezenta situasaun ne’e ba Komandante Jeral no fo fila ba Sekretariu Estadu,” hateten Komandante Logistik PNTL, Superintendente Basilio de Jesus, (11/09), iha Kaikoli, Dili.
Komandante Logistik ne’e mos husu ba SES atu entrega hikas Radio ne’e ba Kompania ne’ebe kaer projeitu sosa radio ne’e, atu responsabiliza.
“Ne’e para Sekretariu Estadu bele halo fali xamada ba kompania refere, no kompania tenke hola fila fali baterai foun no fo fali ba PNTL, buat sira ne’e la’os at maibe tanba deit baterai,” Komandante Logistik ne’e tenik.
Entretantu Reprezentante Povu iha Parlamentu Nasional, Deputadu Virgilio Hornai dehan, Radio Komunikasaun ne’e importante tebes ba polisia, tanba ne’e governu tenke sosa radio ne’ebe iha kualidade, nune’e bele fasilita servisu polisia nian ho diak.
“Problema maka kompania ne’ebe maka fa’an buat ne’e la tuir espesifikasaun ou nia criteria ne’ebe iha, ne’e duni hau hanoin kompania ne’e tenke responsabiliza, no ita ne’ebe maka ba hola ne’e tenke hatene sasan ne’e iha duni kualidade diak ga lae,” Deputadu Hornai sujere.
“Se lae sosa tiha la uza, depois soe, ne’e labele tanba gasta osan arbiru, ne’e duni husu para bele responsabilidade,”.
