“Prezensa eis Prezidenti Asembleia Parlamentar Portugal ninian,Doutor Jaime Gama ho eis Prezidenti Parlamentu Cabo Verde, Aristires Lima, ami aproveita konvida mai iha terseira lejislatura ne’e atu hahu nia primeiru ano lejislativu, ami hahu uluk ho seminariu ida ne’e atu sira hato’o sira
esperiensia kona ba funsionamentu Parlamentu ninian em relasaun orgaun ezekutivu Governu,” hateten Vise Prezidenti Parlamentu Nasional, Deputadu Aderito Hugo, (11/09), iha PN.
Seminariu fahe esperiensia ne’e rasik hala’o durante loron lima, hahu iha dia 05 to’o 11 Setembru.
Entretantu Sekretariu Estadu Komunikasaun Sosial (SEKS), Nelio Izaac hateten, prezensa peritus nain rua ne’e importante tebes hodi fahe sira nia esperiensia kona ba funsionamentu Parlamentu inklui orgaun ezekutivu Governu.
“Hau hanesan membru Governu foun, hau aprende buat ruma husi sesaun ida ohin ne’e, hein katak ba oin ita orgaun ida-idak bele la’o tuir nia kbi’it ne’ebe mak iha,” SE Izaac esperansa.
Iha fatin hanesan Eis Prezidenti Parlamentu Nasional Cabo-Verde, Aristires Lima iha nia fahe esperiensia ne’e dehan, pozisaun Governu Timor-Leste nian, Orgaun Soberanu nia responsabilidade mak kondusaun no ezekusaun politika interna no eksternal.
“Governu konstitui ho Primeiru Ministru, Ministrus ho Sekretariu Estadu, Prezidenti da Republika inklui Prezidenti Parlamentu Nasional para kondusaun no ezekusaun politika interna no eksternal,” dehan eis Prezidente PN Cavo Verde ne’e.
