“Ami seidauk programa konkreta e ami sei kordena ami sei prepara ami nia programa mak ami foin tun ba,” hateten Deputada Domingas Alves da Silva alias Bilo-Mali, iha PN.
Komisaun Parlamentar ne’ebe estabelese iha dia 22 Agustu 2012, no Deputada Bilo Mali rasik sai membru Komisaun F ne’ebe trata asuntu Edukasaun, Saude, Veteranus no Igualidade de Jeneru.
“Komisaun hitu (7) mak ami forma ona, ne’ebe ohin ba oin ami kada komisaun ida-idak sei iha enkontru ida hodi kordena oinsa mak prepara ami nia programa,” Deputada ne’e katak.
Entretantu Deputadu Mateus de Jesus katak, fiskalizasaun seidauk bele hahu tanba komisaun seidauk estabelese meja das komisaun ninian.
“Tuir lolos ami iha tempu resesu hela, horbainrua mak ami foin aprova fali deliberasaun ida,” Deputadu de Jesus tenik.
Iha sorin seluk Sekretaria Meja Parlamentu, Deputada Maria Fernanda Lay informa, atividade fiskalizasaun kontinua la’o nafatin maibe tenke forma uluk komisaun espesializada permanente.
“Ami tenke forma lai komisaun espesializadas permanente foin mak komesa hili, e horseik kada komisaun area ida-idak ninian,” Deputada Lay dehan.
