“Ami suporta sentru treinamentu ospitalidade atu garante kualidade tanba bainhira ita enkoraja no hasa’e joventude sira nia, ba futuru sira hetan moris ne’ebe diak nune’e mos eskola jardin infantil sira enkoraja sira atu aprende no lee,” hateten Xefe Australia Osidental,Don Hancey, (23/08),
bainhira hatun ekipamentus ne’ebe sira lori ho Ro Naval Australia Waramungu, iha Ponte Cais, Dili.
Alende ne’e sira mos fo ajuda hanesan mejas, karteiras inklui livrus imajen (buka bergambar) 600 ba labarik sira iha eskola infantil Sub-Distritu Maliana no Lautem.
Iha vizita Ro Naval Australia durante loron rua iha Dili, ekipa ne’e mos sei halo limpeza iha sentru komunidade, kapela no eskola sira iha Dili laran, e sira mos sei konvida estudante no profesores sira husi ETDA atu partisipa sira nia serimonia iha ro laran, “hanesan skill ida ba sira atu hare prosesu tein aihan ne’ebe peritus sira tein,” Xefe Hancey tenik.
Iha parte seluk Diretora ETDA, Palmira Pires sente kontente ho apoiu husi indvidual nain rua ne’ebe ho voluntariu atu ajuda livrus tein nian ba sira e sira presiza tebes livrus ne’e.
“Sira nain rua hanesan peritu ba tein aihan iha Australia no ida seluk servisu hanesan prepara katering ne’ebe ho kualidade entaun sira mai hare servisu ETDA nian hodi apoiu ETDA atu dezenvolve sentru ospitalidade ho diak no kualidade,” dehan Diretora Pires.
Tuir nia, Sentru Ospitalidade ETDA presiza tulun husi entidade hotu, liu-liu governu Timor-Leste atu dezenvolve no presiza rekursu umanu ne’ebe iha kualidade iha setor ospitalidade iha futuru.
Llivrus reseita tein hahan ne’e, sira sei tau iha biblioteka sentru ospitalidade ETDA nian ne’ebe foin halo konstrusaun no sei remata iha fulan Dezembru tinan ida ne’e.
