“Iha tinan rua ka tolu nia laran kona ba implementasaun programa dezenvolvimentu suku ne’e mak distritu ne’be ita hare katak nia iha ona kapasidade, e husi total orsamentu $22 mil, kada suku sei hetan mais umenus 700 mil hanesan ne’e,” hateten Ministru Estatal, Jorge da Conceicao Teme, iha nia knar fatin Colmera, Dili.
Atu implementa programa ida ne’e, Ministeriu sei halo rekrutamentu ba staf tekniku sira, hodi halo treinamentu ba sira antes tun ba baze sai orientador iha kada sukus.
Tuir Politika iha IV Governu Konstitusional, Distritu hat (4) ne’ebe mak sei estabelese uluk Kamara Munisipiu (KM) mak hanesan Distritu Baucau, Bobonaro, Dili no Distritu Oe-Cusse.
“Kuandu implementa tiha programa ne’e mak ita hare iha rezultadu diak, entaun ita bele halo ona eleisaun de munisipal,” Ministru Teme katak.
Iha sorin seluk Deputadu Pedro da Costa katak, dezenvolvimentu tenke la’o to’o iha Distritu no Sub-distritu sira.
“Agora dadauk dezenvolvimentu iha deit iha sidade Dili, maibe ba futuru tenke desentraliza iha distritu sira,” tenik Deputadu ne’e.
Tuir nia, ho estabelesementu KM iha Distritu 4 ne’ebe identifika ona,, govenru sentral bele ona fahe poder ba Governu lokal, nune’e sira bele jere rasik sira nia dezenvolvimentu.
“Poder balun ita tenke fo ona ba iha distritu sira ne’e, atu nune’e sira mos sente iha responsabilidade, hare difikuldade saida mak sira iha,saida mak bele dezenvolve no saida mak presiza halo e sira bele akompanha dezenvolvimentu ne’ebe mak iha,” Deputadu ne’e dehan.
