Hafoin fulan ida resin eleisaun jeral Parlamentar remata, ekipa Comisaun Nasional das Eleisaun (CNE) hamutuk ho CNE no Polisia Distritu Oe-Cusse halo limpeza ba atributu Partidus Politiku (Parpol) sira ne’ebe taka iha fatin publiku durante eleisaun lejislatura.
“Durante loron tolu hahu husi Kuarta to’o Sesta semana ne’e, ekipa Comisaun Nasional das Eleisaun husi Nasional kordena hamutuk ho CNE distritru Oe-Cusse halo limpeza jeral hodi hasai atributu hirak ne’e,” dehan Diretor Jeral Relasaun Publiku CNE, Arlindo Soares ne’ebe akompanha husi funsiunariu nain rua husi CNE Distritu Liquisa no Oe-Cusse, foin lalais iha Distritu Oe-Cusse.
Tuir nia, bazea ba regulamentu eleitoral,depois de eleisaun remata Parpol sira tenke hasai hotu sira nia atributu partidu hanesan stiker, spanduk, pamfletu no poster sira husi fatin Publiku hodi labele implika meiu ambiente.
Alende ne’e, ekipa ne’e mos aproveita oportunidade ne’e hodi halo evaluasaun ba progresu servisu ne’ebe sira halo ona durante tempu kampanha ba eleisaun prezidensial no parlamentar. “Hodi sukat progresu saida mak ami atinji ona no saida mak seidauk, nune’e bele hadia iha futuru,” tenik Diretor Jeral ne’e.
Entretantu Prezidente Joventudi Distritu Oe-Cusse, Fredelino da Crus Beun Sila konsidera, atividade ne’e hanesan edukasaun sivika ida no sai ezemplu ba populasaun li-liu joventude sira.
“Ida ne’e atu hanorin mai ita povu, lider partidus politikus, li-liu hau nia maluk foinsa’e sira atu banati tuir katak depois eleisaun atributu sira ne’e hasai tiha husi publiku iha futuru,” hateten Prezidente Joventude Distritu Oe-Cusse ne’e.
Iha fatin hanesan Adjuntu Komandante Polisia Distritu Oe-Cusse ne’ebe akompanha iha atividade ne’e, Albino Mouzinho katak sira nia involvementu iha atividade ne’e la’os atu halo operasaun ba atributu direitamente maibe akompanha no atu fo seguransa.
“Fo seguransa, e tuir lolos ne’e responsavel lider politika sira maka hasai molok loron tolu eleisaun akontese ka masa tenang,” dehan Komandante Mouzinho.
