Atu fo asistensia ba vitima Violensia Bazeia ba Jeneru (VBJ) no Violensia Domestika (VD), oras ne’e dadaun iha ona Uma Mahon hitu (7) mak eziste iha rai laran, iha Distritu Baucau, Oe-Cusse, Suai-Manufahi, iha Lospalos-Lautem, inklui iha Distritu Dili.
“Hahu husi tinan 2002 to’o agora ita iha uma mahon hanesan iha distritu Dili Fokupers, Caza Vida, Pradet, Salele,Uma Mahon Forum Peduli Wanita iha Oe-Cusse, Uma Mahon Paz iha Baucau, no Uma Mahon Rogerio iha Lospalos,” hateten Xefe Departementu Promosaun no Protesaun ba Feto, Joana da Cunha, foin lalais iha Bemori, Dili.
Enkuantu Uma Mahon Maria Tapo iha Distritu Bobonaro, Sub-distritu Maliana ne’ebe foin lalais loke (02/08), hanesan mata dalan ba Uma Mahon sira seluk, tanba Uma Mahon ne’e halo iha nia rai rasik, enkuantu sira seluk sei aluga fatin.
“Ministeriu Solidaridade Sosial kopera no Fokupers atu jere Uma Mahon ne’e,” dehan Xefe Departementu ne’e.
Tuir kriteriu ne’ebe iha, Uma Mahon hotu tenke iha rai rasik, uma rasik, mediku, iha rekursu umanu ne’ebe sifsiente inklui konselador, fatin espasu ba vitima labarik no adultu no mos fatin halimar ba vitima sira nia oan.
Iha parte seluk Membru Parlamentu Nasional, Deputada Josefa Alvares Soares, hateten Uma Mahon labele sai fali NGO ida maibe ne’e responsabilidade governu nian.
“Uma mahon tenke iha lei organiku rasik no rejimentu atu jere instituisaun kona ba finansiamentu, e hau hanoin governu tenke tau matan,tanba ne’e partensia govenru nian,” dehan Deputada Soares.
