Tanba Governu liu husi Ministeriu Edukasaun (ME) la suporta modo ba programa merenda eskolar nian, Eskola Primaria 28 Agustu uza osan kas eskola nian hodi sosa modo, nune’e alunus sir abele han.
“Hare ba distribuisaun aihan ba program merenda eskolar la kompletu hanesan fo deit fos, modo no mina laiha entaun ami foti alternativa hodi impresta osan husi rezerva konvensosoens eskola nian hodi sosa modo,” hateten Diretor Eskola 28 de Agustu, Martinho da Cunha, (27/07), iha distritu Oé-Cusse.
Alende ne’e tuir Diretor ne’e katak, parte eskola mos kolabora ho inan aman husi estudante sira, oinsa mak bele resolve problema ne’e.
“Se inan aman bele ajuda ami , fo ami deve modo, hafoin osan transfere mai, foin maka selu entaun ne’e bele garantia sustentabilidade merenda eskolar ba estudantes, tanba inan aman alunus balu kuda modo iha sira nia kintal,” Diretor tenik.
Entretantu Reprezentante inan aman, Constancio Suni katak problema ne’e akontese tanba konsekuensia husi sistema sentralizadu no interese particular maka’as liu husi nai ulun balun.
“Ida ne’e la’os failansu husi dirigente eskola sira maibe impaktu husi ita nia sistema sentralizadu, buat hotu-hotu hein desizaun husi nasional, entaun todan ne’e implementador sira maka simu.depois la iha seridade husi nai ulun interese partidaria makas liu fali komum,” Reprezentante Inan aman ne’e tenik.
Tanba ne’e nia sujere ba ME atu la’o tuir verba ne’ebé maka Parlametu aprova tiha ona.
‘’Buat sira ne’e lolos ne’e tenke la’o nafatin, tanba orsamentu ne’e ,ita nia Parlamentu Nasional aprova tiha kada tinan, nusa maka budu fali osan sira hodi tama fali ba kofre estadu ou ba bolsu diretores sira, nia preokupa.
Hatan ba kestaun ne’e Diretor Educasaun Regional Oe-Cusse, Justinho Neno hateten programa merenda eskolar paradu no la’o tarde tanba transferensia orsamentu husi nasional tarde.
