Konsumidores ikan iha Distritu Oe-Cusse lamenta tanba stok ikan iha merkadu capital Oe-Cusse menus enkuantu fasilidade peska nian kompletu no tasi Timor iha potensia ikan ne’ebe barak.
“Ita nia tasi luan no ikan barak tebes no governu oferese ekipamentu peskas nia lubuk ida, maibe ita atu hola deit ikan aras ka los, ne’e lolos labele akontese,” lamenta Konsumidores Ikan Domingos Ati, (30/07), iha Merkadu capital Oe-Cusse, iha oe-Cusse.
Konsumidores Ati husu ba peskadores sira atu utiliza ekipamentu ne’ebe iha ,tuir nia funsaun hodi hasa’e rendimentu peskadores nian inklui responde ba nesesidade publiku
Iha sorin seluk Diretor Oxfam Filial Distirtu Oe-Cusse, Armindo dos Reis Santos hateten sira nia parte oferese ekipamentus no kapasita ona grupu peskadores lubuk ida maibe sira rasik la aproveita matenek ne’ebe iha.
“Mentalidade dependensia no la hadomi sira nia profisaun,” hateten Diretor Oxfam ne’e.
“Hau la hatene ema maka baruk atu utiliza ajudus sira ne’e ga la kreativu ou ema Oe-Cusse hakarak tabele nafatin ba ajudus ne’ebe kada tinan oferese ba sira , waihira ami tun ba cek sira dehan at no lakon,” dehan Diretor ne’e.
Entretantu tuir Diretor Agrikultura e Pesca Distritu Oe-Cusse, Jose Oki hateten stok ikan iha merkadu menus tanba kondisaun no ekipamentu inklui konesementu peskadores sei naton e presiza kapasita tan sira.
