“Hau sente haksolok tanba bele mai hikas iha Timor-Leste, ne’e nudar hau nia visita daruak nudar Sekretariu Jeral Nasoens Unidas nian. Hau haksolok teb-tebes mai iha ne’e enkuantu Timor-Leste marka aniversariu ba dala sanulu dezde restaurasaun independensia, no tama ona ba tinan sanulu nudar membru Nasoens Unidas,” dehan SJ ONU, Ban Ki-Moon, iha konferensia imprensa hafoin hasoru malu ho Presidente da Republika (PR) Taur Matan Ruak (15/08) iha Palasio Prezidente Nicolau Lobato, Dili.
Tuir nia, iha hasoru malu 30-minutu ne’e Prezidente ho SJ ONU halo ona diskusaun kona ba servisu UNMIT no ONU nia Country Team.
Enkuantu misaun UNMIT rasik sei remata iha fin de tinan ne’e 2012, ONU hakbesik a’an ona ba lider Timoroan hodi determina sira nia misaun iha Timor-Leste ho forma foun, hodi bele adapta ONU nia apoiu tuir nesesidade sira ne’ebe muda dau-daun iha nasaun ne’e.
Iha biban hanesan PR Taur Matan Ruak katak iha asuntu importante tolu mak sira diskute iha sorumutu ne’e no importante ba Timor-Leste.
“Koalia kona ba asuntu lubuk ida, maibe ami konsentra ba asuntu tolu importante, ida saida maka ita halo ona iha tinan hira ne’ e nia laran hanesan progresu, dezenvolvimentu, harii paz no demokrasia. No segundu saida maka ita presiza halo iha tempu oin mai hare liu kona ba misaun ONU ne’ebe maka atu remata no koalia mos kona ba asuntu edukasaun ne’ebe maka nudar asuntu importante,” PR Ruak.
Alende ne’e tuir PR Ruak ho visita ida ne’e bele mos hametin liu tan koperasaun servisu entre ONU ho Timor-Leste ba futuro, hodi haforsa liu tan saida maka nudar frakeza Timor-leste nian.
