“Husi bankada CNRT ho PD ninian seidauk hatama ninia lista xefe bankada ninian,” hateten Vise Prezidenti Parlamentu Nasional, Deputadu Adriano do Nascimento, (06/08), iha PN.
Tuir nia, hafoin partidu ida-idak iha ona Xefe Bankada mak foin bele ajenda hodi halo plenaria, karik sei kleur oituan tanba agora dadaun bankada ida-idak halo hela eleisaun nomeisaun ba xefe bankada nian.
Entretantu Deputada husi Bankada Congresu Nasional Reknstrusaun de Timor (CNRT), Carmelita Caetano Moniz dehan, CNRT iha no nomeia ona ba Xefe Bankada.
“Ami desidi tiha ona, ami nia prezidenti bankada mak Deputadu Natalino,” dehan Deputada Moniz.
Iha sorin seluk Deputadu Bankada Fretilin, Estanislao da Silva katak Fretilin mos nomeia ona sira nia Xefe Bankada.
“Ami nia Xefe Bankada mak Senhor Aniceto Guterres Lopes, Vise Xefe Bankada mak Deputadu Francisco Branco no Deputada Josefa Alvares Soares, sira nia naran ami haruka tiha ona ba meja parlamentu,” Deputadu da Silva katak.
Enkuantu Partidu Frente Mudansa nia Xefe Bankada mak Deputada Bemvinda Catarina. “Frente Mudansa nia prezidenti bankada mak hau rasik, lista naran aprezenta ona ba iha meja parlamentu,” hateten Deputada ne’e.
