Organizasaun Feto Kbi’it Servisu Hamutuk (FKSH) suporta feto foinsa’e nain sanulu (10) hodi tuir formasaun hasa’e kapasidade iha Sentru Formasaun Professional ne’ebe kobre iha rai laran.
“Iha tinan hirak liu ba ami suporta feto foinsa’e nain 10, nain 4 tuir treinamentu suku, tein, no halo dosi iha Sentru Formasaun Madre sira nian iha Distritu Baucau durante tinan ida foin dadauk sira remata sira fila ba Ermera harii rasik sira nia sentru treinamentu, balun tuir formasaun komputador iha Eiros e agora dadaun sira iha abilidade no estuda iha Universidade,” informa diretora FKSH, Gisela de Carvalho, (06/08), iha nia knar fatin Bairo-Pite, Dili.
Iha mos papel importante FKSH, mak hasa’e no haforsa kapasidade feto iha area ekonomia no lideransa nian hodi involve iha prosesu dezenvolvimentu nasional, tanba foinsa’e mak nudar autor ba dezenvolvimentu nasaun ida nian.
Alende ne’e FKSH mos halo advokasia ba feto foinsa’e sira atu fiar an foti desizaun ne’ebe sira iha inklui mos fo treinamentu lideransa, atu sira bele lidera sira nia grupu ho diak no involve iha sosiedade nia le’et.
“Ami mos fo bolsa estudu ba feto no mane foinsa’e sira hodi hala’o estudu iha Universidade no sekundaria e durante ne’e fo ona ba benefisiario hamutuk 19,” Diretora FKSH ne’e katak.
Foinsa’e mak nudar autor ba dezenvolvementu, tanba ne’e labele dukur liu no tenke prepara aan hodi tuir formasaun oin-oin, tanba kada tinan kompetisaun aumenta maka’as.
“Joventude ida-idak tenke kapasita an iha area hotu, hanesan atividade ruma ema konvida ba tuir, ba tuir deit atu aumenta imi nia konesementu oituan, joventude labele dukur no hein deit, tanba governu uza ema ne’ebe intelektual ,” dehan Deputada Josefa Alvares Soares.
