“Agora dadaun prosesu to’o ona iha fase survey land ba area balun no fatin balun, hodi nune’e ita hatama ita nia planu, depois ita bele halo operasaun ba fatin hirak ne’ebe identifikadu ne’e,” dehan Komandante Operasional, Superintendente Xefe Armando Monteiro, (30/07), iha Kaikoli, Dili.
Komandante ne’e haktuir, wainhira iha operasaun mak hetan duni prostitute sira halo atividade prostituisaun, Polisia sei kaptura no sei prosesa sira tuir lei ne’ebe iha.
Entertantu Deputada Josefa Alvares Soares dehan, dala barak ona Parlamentu Nasional husi kedas tempu II lejislatura hatama ona karta ba Polisia hodi bele kaptura ema hirak nebe maka hala’o atividade ne‘e.
“Uluk kedas ami haruka surat ba sira be-beik ona ke sira devia halo, PNTL tenke kaer duni, tanba maior parte prostitute sira ne’e, mai iha ne’e la’os legal. sira mai ho visa mai halo buat ida maibe mai halo fali buat seluk, ne’e duni ne’e responsabilidade polisia nian atu halo razia,” sujere Deputada Soares.
Tuir nia, Grupu Feto Parlamentar (GMPTL) tuir mai ne’e, sei halo planu estratejiku ida servisu hamutuk ho Polisia no Institusaun ne’ebe maka hare kona ba ba ida ne’e, ho nune’e bele redus prostitusaun iha rai laran ne’e.
