“Mediku espesialista Timor oan ne’ebe oras ne’e dadaun fila fali ona mai halao knar iha Ospital Nasional Guido Valadares hamutuk nain 12, tanba rekursu limitadu mediku espesialista Timoroan tenke mantein iha HNGV atu prepara sira ho didiak, enkuantu Ospital Referral sira ita kontratu espesialista husi liur alende ne’e ita mos haruka tan ona balun ba estudu seidauk remata hamutuk 27 hanesan iha Indonesia 22, Fiji 3, Malaysia nian 2 iha area oioin,” hateten Diretor Nasional Rekursu Humanu, Duarte Ximenes, foin lalais iha Bidau Toko Baru, Dili.
Mediku Espesialista hirak ne’e mak hanesan, Espesialista Internista nain rua, Pedeatria nain ida, OBGYN nian tolu, Cirurgia iha rua, Anestecia nain ida, Oftamologia nain ida, Dermatologia nain ida no Espesialista Psikiatria nain ida.
Tanba ne’e iha future Ministeriu Saude (MS) sei moderniza fasilidade saude no ekipamentu medikus hodi apoiu medikus sira bele dezenvolve setor saúde ho diak liu tan.
Nia dehan, Ministeriu tenke hare didiak mediku jeral ne’ebe hakarak atu ba hasai espesialista, labele fo arbiru bolsu estudus ,tanba sira iha obrigasaun, iha kompetensia ne’ebe nato’on, maisumenus tinan tolu ba leten area ne’ebe sira hili.
Entretantu Albano Salem, nudar Komunidade nia sente orgulhu tanba Timor-Leste maske foin ukun aan tinan 10, maibe dezenvolvementu iha area hotu inklui rekursu humanu ne’ebe nato’on, liu-liu iha setor saude.
“Hau hanesan Timor oan sente orgulhu los rona Timor iha ona espesialista rasik, ita espera katak programa v governu nian atu loke tan ospital referral ida ne’ebe iha kualidade , espesilaista 12 ne’e mos preparadu ona, hau hanoin ita bele minimize transferensia moras ba liur,” Komunidade Salem esperansa.
