Hafoin hala’o servisu durante tinan lima iha area promove igualidade de jeneru, Sekretaria Estadu Promosaun Igualidade (SEPI) lansa sira nia website www.sepi.gov.tl iha nia mandatu ikus, ho objetivu atu povu Timor-Leste no estranjeiru bele asesu ba politika ne’ebe SEPI halo hodi promove igualidade jeneru iha Timor.
“Ohin ami lansa website ne’e tanba importante tebes atu dezemina, sensibiliza no fo hatene ba publiku iha rai laran no liur, liu-liu feto maluk sira kona ba situasaun feto Timor-Leste durante iha governasaun AMP,” hateten SE Idelta Maria Rodrigues, (26/07), serimonia lansamentu website, iha Hotel Timor, Dili.
Iha website ne’e iha aktividades lubuk bo’ot ida ne’ebe durante ne’e SEPI halo hodi promove iqualidade generu iha rai laran no liur hanesan vizaun no misaun SEPI nian, planu estrategiku, annual programa relasiona ho CEDAW, diskursu Sekretaria Estadu nian ne’ebe halao iha rai laran no liur, inklui video.
Iha parte seluk Reprezentante Primeiru Ministru (PM), Sekretariu Estadu Politika Energetika, Avelino Coelho hateten iha website ne’e la’os atu hato’o deit progresu ne’ebe SEPI halo durante tinan lima nia laran, maibe mos fo oportunidade ba publiku hotu bele asesu no fo hanoin ba planu estrategiku ne’ebe iha.
“Website ida ne’e sei sai hanesan espasu ida atu ema hotu-hotu bele akompania no lee progresu ne’ebe iha no publiku bele monitoriza atividade ne’ebe SEPI halo iha kuatru governu,” dehan Reprezentante PM, SE Coelho.
Sekretariu EStadu mos hato’o nia parabens ba SEPI tanba ho esforsu ne’ebe halo durante tinan lima nia laran, feto nafatin okupa 31 pursentu kadeiras iha Parlamentu Nasional ba periode 2012-2017. “Ne’e hatudu katak feto sira bele luta ba sira nia hanoin, ba sira nia an no sosiedade Timor,” SE Colho apresia.
Alende lansa website, SEPI mos formaliza Grupu Trabalhu de Jeneru kada Ministeriu no Sekretariu Estadu hotu, e sira ne’e mak sei promove igualidade jeneru iha sira ida-idak nia fatin.
SEPI mos fo sertifikadu rekonesementu ba Radio Komunidade iha 13 distritus ne’ebe durante ne’e fo ona sira nia kontribuisaun ba SEPI hodi promove igualidade jeneru.
