Asosiasaun Advogadu Timor-Leste (AATL) sei fo formasaun ba Lisensiadu Direitu (Sarjana Hukum-Indo) sira kona ba money laundry (lavajen de dinheiru) inklui korupsaun nian, ho objetivu atu hasa’e liu tan sira nia konesementu.
“Hahu iha dia 01 de Setembru to’o iha 30 de Novembru tinan ne’e ami sei fo kursu fulan tolu nian ba ema ne’ebe maka sarjana hukum, atu hasa’e liu tan sira nia konesementu hodi sai assiten Juridiku ou Konsultor Juridiku ou Asesoria Juridika iha area rua mak henesan atu kombate korupsaun no mos kona ba money laundry (pencucian uang),” informa Sekretariu Jeral AATL,Manuel Tilman, (26/07), iha Uma Fukun, Dili.
AATL rasik halo ona aprosimasaun ho Reitor Universidade sira hodi delega Universitariu Lisensiatura Direitus hamutuk 28 atu tuir formasaun ne’e, no formasaun ne’e sei fahe ba grupu rua, 14 pesoas tuir formasaun kona ba korupsaun, no nain 14 seluk kona ba money laundry.
Iha lidun seluk Prokurador Reinato Bere Nahak, konkorda ho inisiativa ida ne’e, e importante tebes atu advogadu sira tuir nune’e bele hasa’e sira nia kapasidade.
“AATL nia planu ne’e kapas, tanba koalia kona ba korupsaun no pencucian uang ne’e presiza ita nia lisensiadu direitu sira mos tenke hatene, kompriende no estuda, la’os deit juis no prokurador sira mak hatene buat ne’e, e hau gosta planu AATL ne’e,” Prokurador Nahak,apoia.
Nia espera katak oportunidade hanesan bele oferese mos ba komonidade tomak, liu-liu iha area rurais sira, hodi nune’e sira mos bele iha konesementu kona ba kestaun ne’e.
