Konstrusaun Portu temporariu Komponente Naval nian iha Hera ne’ebe tinan rua ona maibe seidauk hotu, tanba ne’e husu ba Governu liu husi Sekretariu EStadu Defeza (SED) atu aselera tiha konstrusaun ba portu ne’e.
“Portu ne’e to’o agora seidauk hotu nia konstruksaun, ida ne’e sai hanesan obstaklu bo’ot ida ba Forsa Naval hodi hala’o sira nia atividade maritime ho diak, ne’e duni husu ba Governu foun atu bele finaliza portu ne’e,” sujere Koordenador Peskiza Fundasaun Mahein (FM), Joao Almeida Fernandes, (20/07), iha Balide, Dili.
Tuir FM, maske governu sosa ro bar-barak ba Forsa Naval maibe kuandu laiha kondisaun portu ne’ebe diak mak sei fo impaktu ba ro sira aat lalais.
Iha parte seluk Deputadu Joaquin Amaral, konkorda ho sujestaun ida ne’e, e governu foun tenke tau prioridade ba portu Hera.
“Governu AMP faila ona halo portu ne’e, entaun ne’e hanesan servisu bo’ot ida ba governu foun atu hare kona ba kondisaun ne’e, halo portu temporariu deit tarde ona, oinsa los kuandu halo portu permanente,” Deputadu ne’e duvida.
Tuir nia, portu ne’e importante nune’e bele tau ro sira hodi halo manutensaun no Forsa Naval bele servisu ho diak.
