“Husi ema nain 47 ne’e balun mate tanba monu rasik husi motor, no balun soke malu mak mate, no seluk fali tanba estrada mak ladiak hanesan iha Ermera,” hateten Komandante Tranzitu Nasional, Inspector Xefe Antonio L.C. Soares, (17/07), iha Kaikoli, Dili.
Alende ne’e tuir nia, motorista barak mos seidauk kompriende kona ba sinais tranzitu no regulamentu ne’ebe polisia tranzitu tau iha estrada sira.
Entertantu Deputadu Jose Manuel Fernandes, katak kompara ho nasaun seluk numeru asidente trafiku ne’ebe maka Timor-Leste iha ki’ik liu.
“Ita nia asidente ne’e sei ki’ik liu, iha nasaun seluk numeru trafiku bo’ot liu ita nia rain, e dala barak ita ejiji ba ajenti polisia sira, mais ita rasik mos lakohi atu kontribui atu respeita sinais tranzitu ne’ebe iha,” Deputadu Fernandes tenik.
Deputadu ne’e mos husu ba Diresaun Nasional Transporte e Terestres (DNTT), atu labele fo Karta Kondusaun ka Surat Izin Mengemudi (SIM) ba sira ne’ebe seiduak hatene lala’ok uza kareta ka motor iha Estrada.
“Tenke tes sira ne’e, tenke tes ho didiak labele hare deit katak nia hatene kaer kareta, mais buka liu-liu sira atu respeita no konese kodigu sira ne’e no sinais sira ne’ebe mak ita tau iha estrada, atu nune’e wainhira sira lori kareta sira bele kompriende,” Deputadu ne’e sujere.
