Diresaun Nasional Transporte e Terestres (DNTT) preokupa tebes ho pasajeiru Oe-Cusse nian ne’ebe kontinua hein deit iha Estrada molok atu sa’e ro Nakroma, tanba mini terminal ne’ebe mak governu halo tiha maibe seidauk utiliza no husik abandona.
“Tuir ami nia hatene iha ona mini terminal iha Portu, iha Igreja Motael nia oin, maibe ami la hatene tanba sa maka la uza, e ami sente teb-tebes katak pasageiru sira ne’e wainhira hein ro iha liur fo impaktu maka’as ba movimentu transporte iha parte refere,” kestiona Staf Senior DNTT, Joaõ Eugenio da Silva, hosi nia servisu fatin iha Balide, Dili.
Tanba ne’e iha tempu badak DNTT sei halo konfirmasaun ho Diretor Portu Dili nian kona ba terminal ne’ebe abandona hela ne’e.
“Ami sei koko atu koalia to’ok ho dirasaun portu ne’e atu bele foti solusaun ba kestaun ne’e,” dehan Staff Senior DNTT ne’e.
Iha parte seluk tuir Deputadu Joaquin Amaral, katak terminal ne’e la funsiona tanba governu halo sein iha planu ne’ebe diak.
“Sira hare fatin mamuk ida sira ba halo deit, entaun volume servisu sobre karega malu, pur ezemplu kapal barang ne’e mai okupa tiha fatin, entaun kapal penumpang maka dikorbankan, hau la hatene pasti mais karik hanesan ne’e,” Deputadu ne’e kritika.
Tuir nia, halo terminal tenki determina mos volume pasajeiru, katak kada tinan volume pasajeiru sa’e ka tun, e bazea ba ida ne’e mak deside halo terminal no tuir nesesidade ne’ebe mak iha. “La’os halo tiha, sasan mak nakonu fali iha terminal, depois pasajeiru sira hein fali iha liur.”
