“Ami fo ultimu dia semana ida konta husi loron eleisaun tenke moos hotu husi fatin publiku,” husu Prezidenti CNE, Faustino Cardoso, (09/07), iha Kaikoli, Dili.
Tuir observasaun CNE nian iha dalan publiku hare katak atributu partidu nian to’o agora sei taka nafatin iha dalan publiku sira.
Iha sorin seluk Membru Parlamentu Nasional husi Bankada Partidu Sosial Demokrata (PSD), Deputadu Mario Viegas Carascalao katak, PSD laiha atributu ida mak taka iha dalan publiku, tanba antes eleisaun ema seluk hasai tiha no troka fali ho partidu seluk nian.
“Kalan hau la’o iha Ponte Comoro nian spanduk PSD nian iha ne’eba augenta loron rua ka tolu deit, depois partidu seluk hasai tiha tau fali ninian,” Deputadu Carascalao dehan.
Deputadu ne’e mos husu ba Parpol seluk ne’ebe to’o agora sira nia pamfletu sei taka hela iha dalan publiku, tenke responsabiliza.
Iha fatin hanesan Deputadu Bankada Klibur Oan Timor As’wain (KOTA), Manuel Tilman dehan, pamfletu sira ne’ebe sei taka iha dalan publiku, la’os deit atributu husi Parpol sira maibe mos fotografia Prezidente Taur Matan Ruak nian .
“Nune’e mos katuas Xanana nia oin mos nakles iha fatin balu-balun, maibe nia manan tiha duni iha eleisaun,” dehan Deputadu Tilman.
Iha sorin seluk Deputada husi Bankada Partidu Demokratiku (PD), Jacinta Pereira dehan hasai pamfletu partidu nian husi dalan publiku, ne’e servisu Polisia nian e sira mak hasai.
“Antes tama iha eleisaun loron rua tempu hakmatek ne’e, para atu bele hamos ita nia atributu partidu nian mais to’o ohin loron balun iha dalan Pantai Kelapa nian sira husi Fretilin nian sei iha ne’eba,” Deputada Pereira kestiona.
