Border Pas ka Pasa Fronteira ne’ebe fo-foun implementa deit iha Distritu Bobonaro iha Sub-distritu Balibo atu komunidade sira iha fronteira bele vizita malu, agora implementa ona iha Distritu tolu ne’ebe fronteira kedas ho nasaun Indonezia.
“Projeitu ne’e la’o uluk iha Balibo, iha 15 Dezembru 2011 ita lansa ona iha Distritu Oe-Cusse no iha Suai, e agora komunidade sira iha distritu tolu ne’ebe hela iha fronteira uza ona Border Pass,” hateten Diretora Nasional rejistu Notariadu (DNRN), Maria de Fatima de Araujo, (10/07), iha AeroPortu Nicolao Lobato, Comoro, Dili.
Border Pass ne’e rasik halo lansamentu iha Agustus 2010 iha Mota Ain, ne’ebe asiste direitamente husi Ministeriu Negosiu Estranjeiru Indonezia no Timor-Leste, Martin Netalagawa no Zacarias Albano da Costa.
Funsaun husi Border Pass mak atu hafasil komunidade sira ne’ebe hela besik iha area fronteira hodi vizita malu (Indonezia-Timor-Leste), liu-liu bainhira iha situsaun urjente ruma.
Diretora ne’e afirma, border pass ne’e uza durante loron tolu deit, e benefisiariu sira labele tama liu ba Kupang ka Dili.
“La to’o iha Kupang maibe iha deit Atambua atu bele ba sosa buat ruma iha ne’eba, sira bele uza border pass ne’e,” Diretora ne’e tenik.
Entertantu Deputadu Mateus de Jesus dehan, ida ne’e progresu ne’ebe maka diak, hodi fasilita komunidade sira ne’ebe hela iha fronteira bele vizita malu.
“Ne’e mudansa ne’ebe maka diak, tanba uluk foin iha distritu ida deit maibe agora dadaun bele ona hahu tan iha distritu rua tan ona, ne’e kapas tebes,” dehan Deputadu ne’e.
Deputadu ne’e hatutan, Border Pass ne’e importante tebes no ajuda duni komunidade sira ne’ebe hela iha fronteira, atu hasoru familia sira ne’ebe maka hela iha Indonesia hanesan Atambua.
