Finzidu ou la finzidu, iha eleisaun lejislativu ne’ebe hala’o foin lalais iha 07 Julhu 2012 iha teritoriu tomak, iha votante ida (ferik ida) lori kartaun militante partidu nian ba tuir votasaun, maibe hafoin to’o iha fatin Sentru Votasaun, Poling Staf sira haruka nia fila, tanba lei la fo dalan uza kartaun militante tuir votasaun.
Akontesementu ne’e akontese iha Distritu Baucau, Sub-distritu Baucau Vila, iha Sentru Votasaun Suku Wailili.
“Ohin ami haruka nia fila kedas ba uma foti fali kartaun eleitoral mak tuir vota,” hateten Poling Staf, Juliao Gusmao Belo , iha Sentru Votasaun Wailili, (07/07), iha Baucau.
Tuir Poling Staf ne’e, votante ne’e lori kartaun militante partidu nian ba tuir votasaun, tanba nia la kompriende.
Entertantu Fiskais Bernardino Gusmao mos dehan, ida ne’e akontese tanba kampanha Partidus Politika ne’ebe hala’o durante fulan ida ne’e, la to’o iha komunidade sira ne’ebe hela iha area rurais.
“Partidu Politiku sira halo kampanha door to door tenke to’o iha sira nia uma, sira bele esplika ba sira ne’ebe la hatene,” hateten Fiskais ne’e.
Nia hatutan, tuir lei ne’ebe iha, sidadaun ida atu ba tuir votasaun tenke lori ho Kartaun Eleitoral e la’os lori fali Kartaun Militante Partidu nian.
Entertantu Lider Lokal Partidu Fretilin nian, Fernando Clau Soares Marques katak, Brigada sira husi Partidu Fretilin kuaze fulan ida tomak, hanorin sira nia militante sira iha baze konaba sistema votasaun nian.
“Hanesan sira ne’ebe la konese ka lahatene liu, ami fo duni kartaun militante partidu nian hodi nune’e bainhira ba sentru votasaun, sira ba husu sira la hatene naran sira hatudu deit sira nia kartaun ami fo ne’e sira hatudu deit ida ne’e,” hateten Lider Fretilin ne’e.
