Governu foun tenke kria ministeriu feto nian, nune’e bele haforsa liu tan programa feto ne’ebe maka atu aplika ba maluk feto sira, liu-liu sira ne’ebe maka hela iha area rurais inklui mos iha kapital.
“Iha ministeriu ida ba feto para bele iha lian iha Konselhu Ministru, kuandu iha Sekretaria estadu ida deit ladun iha forsa para atu foti desizaun ruma kona ba feto, karik iha ministeriu ba feto ne’e maka iha forsa maka’as liu tan atu bele kolia iha konselho ministeriu e foti desizaun nebe ke afavor ba feto,” sujere Vise Prezidente Parlamentu Nasional, Deputada Maria Paixao, (10/07), iha Uma Fukun, Dili.
Tuir nia, governu tenke iha planu ne’ebe maka diak ba maluk feto sira nebe maka hela iha area ruarais.
“Programa ne’ebe maka diak para atu bele fo benefisiu ba sira hotu, iha orsamentu du estadu depois deputadu foun sira ne’ebe maka sei mai iha parlamentu ne’e tenke hare mos katak iha orsamnetu ne’ebe sensivel liu ba jeneru,” Vise Prezidente PN ne’e katak.
Entertantu Deputada Teresa de Carvalho sujere, governu presiza halo sosializasaun ne’ebe diak liu tan kona ba papel feto nian ba maluk feto sira ne’ebe maka hela iha area rurais.
“Tanba iha rurais ne’e primitive liu, feto barak maka seidauk iha konesementu kona ba papel feto nian, oinsa maka feto bele partisipa iha dezenvolvementu, no oinsa maka feto bele partisipa iha vida politika,” rekomenda Deputada de Carvalho.
Alende ne’e, governu mos presiza aumenta orsamentu sensivel ba jeneru, nune’e bele halo sosializasaun kona ba lei Violensia Domestika nian, tanba komunidade barak mak seidauk kompriende lolos kona ba lei ne’e.
