Hafoin ba servisu iha ema nia rai, liu-liu Trabalhador sira iha Korea du Sul ne’ebe agora servisu iha ne’eba, barak mak bele ona transforma sira nia ekonomia familia nian tanba kada tinan sira haruka US$1 Miliaun ba familia.
“Maioria husi trabalhadores sira ne’e, iha sira nia vida moris agora iha mudansa tebes la hanesan uluk seidauk ba servisu iha Korea du Sul sira balun sei hela iha uma piku maibe agora sira hela iha uma mutin, iha balun mos gasta osan arbiru deit,” hateten Diretor Nasional Empregu, Paulo Alves, iha fula kotuk durante serimonia despedida ho trabalhadores nain 14, Kaikoli, Dili.
Tuir nia, alende haruka sira mos iha ekipa ida atu halo survey impaktu ba ekonomia familia nian depois de sira ba servisu iha Korea, e hatudu duni rezultadu pozitivu tanba barak mak hetan moris diak kompara ho uluk.
SE Freitas mos hato’o mensajen ba trabalhadores sira iha Korea, atu hatudu komportamentu diak nudar Timor oan, apoiu malu iha servisu fatin hodi hetan osan no konesementu teknologia, esperensia, kultura nune’e bele transforma vida ekonomia familia nian liu-liu iha aspeitu edukasaun no saúde.
“Importante liu mak ne’e gasta osan ho kuidadu dalaruma imi nia osan iha tiha imi gasta arbiru exemplu gasta ba bar hemu lanu demais la hatene oras deskansa entau fila ba servisu fatin bele hetan acidente ne’ebe ita hotu la espera,” SE Freitas apela.
Entretantu Trabalhadora Marcelina Lobato katak maske feto nia mos pronto atu halao servisu iha rai seluk hanesan mos mane hodi bele kontribui ba familia no estado Timor –Leste ho esperensia no kuinesementu ne’ebe sira hetan iha Korea de Sul bainhira fila mai Timor.
“Tuir hau nia planu osan ne’ebe hau hetan durante halao servisu iha Korea, hau fila mai hau sei loke negosio ki’ik ida hanesan loke loja ou negosio seluk hodi bele hetan rendimentu oituan atu bele halo transformasaun ba ekonomia familia uma laran,” dehan Trabalhadora Lobato.
