Diresaun Nasional Irigasaun (DNI) iha Ministeriu Agrikultura e Peska (MAP) sei halo rehabilitasaun ba irigasaun rua, ida iha Distritu Suai no Ainaro, nune’e bele fasilita agrikultor sira halo sira nia natar ho diak.
“Tinan ida ne’e ami atu rehabilita tan rua iha Suai Oebaba, no iha Ainaro iha Raibere e agora dadaun iha prosesu tender, dokumentus ami hatama hotu agora dadaun prosesa hela,” dehan Diretor Nasional irigasaun, Martinho Pereira, iha Comoro, Dili.
Tuir nia, estudus viabilidade halo desde 2009 atu rehabilita irigasaun ne’e, maibe lakonsege e tinan ne’e mak atu halo.
Entertantu Deputada Josefa Alvares Soares dehan, ne’e planu ne’ebe maka diak, maibe tenke halo ho rejultadu ne’ebe maka diak mos.
“Tenke ho kualidade no material sira ne’ebe maka uja ne’e mos tenke hare, dura ga la’e, nia hasil ne’e tenke iha, ezemplu produsaun fos ne’e tenke sa’e atu nune’e ita labele halo importasaun fos husi nasaun seluk,” sujere Deputada Alvares.
