Ministeriu Edukasaun (ME) ho Plan Internasional (PI) asina ona akordu ida kona ba edukasaun ba ema defisiente sira, liu-liu sira ne’ebe durante ne’e la asesu ba edukasaun, ne’ebe sei implementa uluk iha Distritu tolu (3).
“Ohin ami asina akordu ho Plan Internasional ne’ebe hetan fundus husi Governu Alemanha para atu ajuda ita nia maluk sira ne’ebe ke karik matan ladun diak no mos tilun la diak, atu sira mos bele asesu ba edukasaun,” hateten Diretor Jeral ME, Apolinario Magno, iha Vilaverde, Dili.
Distritu hirak ne’ebe implementa uluk programa ne’e mak hanesan Distritu Aileu, Lautem no Distritu Dili ho durasaun tinan tolu deit no hahu iha tinan ne’e kedas. “Depois ita hare to’ok nia progresu durante tinan tolu ne’e la’o oinsa,”.
“Ba ema matan sira ne’e sira iha tipu materiais balun ke bele ajuda ema matan at bele le,bele kompriende buat nebe ita koalia,” Diretor Jeral Magno dehan.
Entertantu Reprezentante Plane International, Jose Mesquita dehan, sira iha koperasaun ne’ebe diak ho ME, e espera katak bele fo edukasaun ne’ebe mak diak ba ema defisente sira hodi hatene lee no hakerek.
“Ida ne’e sei fokus liu ba labarik defisiente sira tanba ita hare kuandu labarik defisiensia ruma ona dala balun ema halo diskriminasaun laharuka sira ba eskola,” Reprezentante PI ne’e katak.
Enkuantu total fundus ne’ebe apoiu husi Governu Alemanha hamutuk 200.000 dolares Amerikanu ba programa ne’e durante tinan tolu nian.
Orsamentu ne’e alende uza ba edukasaun ba ema defisiente sira, mos atu fo treinamentu ba professor sira nune’e bele atende labarik defisiente sira ho diak.
“Pur ezemplu labarik sira ne’ebe labele rona, fo treinu oinsa para profesor sira hatene lian jestu nian, nune’e labarik sira bele hatene,” Reprezentante PI ne’e esplika.
