Joventude husi rejiaun I (Distritu Baucau, Manatuto, Lospalos no Distritu Viqueque) 330 ne’ebe rejistu iha Sekretariu Estadu Formasaun Professional e Empregu (SEFOPE) distritu Baucau, nain 163 tuir ona kursu lian Korea bazico iha Baucau durante fulan 6, hahu Junu to’o Dezembru tinan ne’e.
“Ami husu ba joven sira ne’ebe rejistu ona sira nia naran iha SEFOPE regional Baucau atu bele hakat mai iha ne’e para bele tuir kursu,” husu Pontu Fokal SEFOPE Distritu Baucau, Romualdo A. de Sousa, (21/06), iha Tirilolo, Distritu Baucau.
Tuir nia, agora dadaun iha sala lima mak identifika ona e kada sala iha ema nain 35-36, total sira ne’ebe tuir ona kursu ne’e besik atus rua ona.
“Iha Baucau rasik sira presiza ne’e duzentus i tal, maibe fatin mak problema oituan uluk Administrador Distritu oferese tiha ona sala armajen mai ami, maibe ikus fali mai labele tanba atu rai sasan eleisaun nian, e Eskola Sekundaria numeru 01 Baucau, sira oferese sala rua mai ami atu hala’o kursu iha ne’eba,” Pontu Fookal ne’e esplika.
Entretantu Cesaltino dos Santos Freitas, joventude ne’ebe partisipa iha kursu ne’e dehan, nia tuir kursu ne’e, tanba hakarak ba servisu iha Korea.
“Durante ne’e hau laiha servisu,e hau koko tuir to’ok kursu lian Korea nian, nune’e hau bele ba servisu iha ne’eba hodi sustenta moris familia nian no hau bele kontinua hau nia estudu iha universidade bainhira hau hetan osan barak,” hateten Joventude Freitas ne’e.
