Durante iha prosesu kampanha husi hahu to’o remata, asuntu feto ladun koalia husi lideransa partidus Politiku (Parpol) sira iha sira nia programa kampanha, tanba maioria mane mak domina ka sai porta voz partidu nian e feto kontinua iha segundu pozisaun.
“Ita hare realidade ne’ebe iha, katak feto minimu tebes sai porta voz partidu nian, atu hato’o programa iha kampanha, tanba feto maioria foin involve iha vida politika entau sira rasik la fiar an atu halo influensia ba partidu atu hatama asuntu feto iha programa partidu nian durante ukun tinan lima mai,” dehan Responsavel Ekipa Monitorizasaun Fundasaun Alola, Adelia Guterres, iha Mascarenhas, Dili.
Tuir observasaun Fundasaun Alola (FA) nian ba kampanha Parpol sira tantu liu husi televizaun ka direitamente iha fatin kampanha, hatudu katak husi kandidatu feto Parpol sira ne’ebe tuir formasaun iha FA durante loron tolu ne’e, iha deit kandidatu feto nain tolu (husi Bloku Proklamador, UNDERTIM no PSD) deit mak sai porta voz no koalia programa feto nian bainhira kaer ukun durante tinan lima mai.
Nia dehan, ida ne’e akontese tanba involvement feto iha vida politika sei araska hodi preenxe kouta ne’ebe iha, e mos kauza husi lei eleitoral ne’ebe nain ida tenke feto husi lista ne’ebe parpol sira hatama, katak feto sai hanesan kompletador deit. “Entaun mane la fo oportunidade ba feto atu hato’o programa kona ba asuntu feto nian,”.
Entretantu Kandidatu feto husi Partido Fretilin, atual Deputada Josefa Alvares Soares katak asuntu jeneru la’os feto deit mak luta, maibe mane mos e durante iha kampanha nia lran iha parpol barak mak hato’o programa partidu nian, ne’ebe fo benefisiu ba feto no mane.
“Ami durante ne’e iha programa barak ne’ebe sensivel ba jeneru, hanesan fo kontribuisaun ba feto sira atu hasa’e sira nia kapasidade total, nune’e sira mos bele sai parseiru dezenvolvimentu hanesan mos mane,” dehan Deputada Soares.
Deputada ne’e dehan, se povu fo fiar ba sira nia partidu atu ukun iha tinan lima mai, sira sei harii Sentru Formasaun iha area hanesan Karpintaria, Agrikultura, Hotelaria no seluk tan, nune’e bele akomoda joventude feto no mane ne’ebe lahetan oportunidade hodi kontinua estudu tanba problema ekonomia.
“E ami mos iha programa ida atu fo bolsu estudu ba foinsa’e feto no mane sira ne’ebe iha kapasidade intelektual atu hala’o estudu iha estrangeiru, nune’e bainhira fila mai bele sai lideransa ne’ebe diak no iha kualidade,” dehan Kandidatu ne’e ho lian kampanha.
