Muzika Inu Nasional ‘Patria-Patria’ nudar simbolu identidade nasaun Timor-Leste, tanba ne’ee importante ba sidadaun hotu atu hatene,liu-liu sira ne’ebe ba servisu iha ema nia rai hanesan iha Korea no nasaun seluk.
“Hanesan foin dadauk akontese trabalhadores Timor oan balun iha Korea, bainhira ema haruka sira kanta Inu Nasional nasaun ida –idak nian, komu sira la hatene no la dekor Inu Nasional Timor nian, entaun sira halai ba involve fali iha grupu trabalhadores husi Indonezia hodi kanta Inu Nasional Indonesia nain,” hateten Diretor Nasional Empregu, Paulo Alves, iha serimonia despedida ho trabalhadores na’in 14 fulan kotuk, iha salaun enkontru SEFOPE, Kaikoli, Dili.
Diretor ne’e dehan, nudar joventude no nudar sidadaun iha obrigatorio atu dekor muzika Inu Nasional Timor-Leste nian, tanba Inu Nasional no Bandeira mak hatudu nasaun ida nia identidade lolos.
Tanba ne’e Diretor Alves afirma, sira sei fo treinu kanta Inu Nasional (tama iha agenda kursu nian) ba trabalhadores sira antes desloka ba Korea du Sul, nune’e bele promove diak liu tan identidade Timor nian iha rai Korea.
Entretantu Deputadu Francisco Jeronimo, katak trabalhador Timor oan iha Korea lahatene muzika Inu Nasional Timor nian, tanba governu laiha planu ne’ebe diak ba sira.
“Lei emblema nasional ne’e fo kompetensia ba governu liu-liu Ministeriu Edukasaun kada loron Segunda-feira hala’o serimonia hasa’e bandeira iha eskola hotu no kanta Inu Nasional, hanesan iha tempu Indonezia, entaun fasil ba ema hotu atu dekor no hatene Inu Nasional Patria –Patria ho diak,” hateten Deputadu jeronimo.
Tuir nia, la’os deit trabalhador sira mesak mak lahatene ka la dekor, maibe Funsiunariu Publiku balun mos la dekor muzika ne’e.
