Kareta multifunsaun hamutuk 16 ne’ebe sosa husi Kompania Osean atu oferese ba servisu Sentru Saúde sira ne’ebe seidauk iha kareta multifunsaun liu-liu programa Servisu Integrado Saúde Komunitaria (SISKA) la’o ativu no diak liu tan, oras ne’e dadaun tama ona iha ponte kais hodi hein prosesu tuir mai.
“Sim ami hetan informasaun husi kompania katak, agora dadaun kareta 16 ne’e tama ona iha pelabuhan maibe seidauk entrega ba ministerio tanba sei liu husi prosesu tuir mai tan,” dehan Diretor Nasional Administrasaun Logistica Ministerio Saúde, Leão Borges, Kaikoli, Dili.
Diretor ne’e hatutan, alende kareta multifunsaun 16 ne’e, MS mos iha ona planu atu sosa tan kareta 43, ambulansia 19 no kareta operasional 8, hodi fasilita servisu pesoal saude sira, liu-liu iha area remotas, bele fo asistensia ne’ebe diak ba komunidade sira.
Orsamentu ba planu ne’e mai husi Orsamentu Jeral Estadu (OJE) 2012 nian, e agora tama iha faze tenderizasaun.
Enkuantu total kareta multifunsaun ne’ebe agora ativu hala’o hela sirkulasaun iha Sentru Saúde (SS) hotu hamutuk 50 deit, e SS hamutuk 65.
Nia hatutan, SS ne’ebe seidauk iha kareta multifunsaun mak hanesan, Sentru Saúde Becora, Laulara, Wailili,Cailaco, Maliana vila, Gleno, Fatuberlio, Lautem, no Sentru Saude Tutuala, e kuaze iha Distritu ida sentru saúde rua ka ida mak seidauk hetan kareta kareta multifunsaun balun iha ona maibe ho kondisaun at presiza troka foun.
Nia espera katak ho prosesu tenderizasaun ne’e kompania sira bele prense criteria ne’ebe iha nune’e nia prosesu negosiasaun lao lalais tanba ministerio saúde presiza tebes transporte atu halao programa ministerio nian ba povu sira liu-liu area remotas.
Iha parte seluk Vise Prezidente Komisaun F Parlamentar,Deputadu Francisco Jeronimo husu ba MS atu prosesa lalais kareta multifunsaun 16 ne’ebe tama ona iha ponte kais ne’e, nune’e bele desloka ona ba iha SS sira ne’ebe sei falta transporte durante ne’e, inklui mos kombustivel.
“Hau foin asiste situasaun ida iha distritu Liquiça tanba Sentru Saúde laiha kareta multifunsaun inklui kombustivel mos laiha, entaun hau mak tula moras lori ba ospital nasional ne’e la los tanba responsavel estadu nian,” dehan Deputadu Jeronimo.
