“Ami agora la liu husi ne’eba tanba dalan no terminal mak la diak,” hateten Kondutor Bis Albatros diresaun Baucau, Norberto Neves Sarmento, iha Lesidere, Dili.
Tanba ne’e nia parte husu ba Governu atu hadia terminal Becora no estrada Fatuahi nian, nune’e bis sira bele para no liu husi ne’eba hanesan uluk.
“Dala ruma ami nia kareta para iha ne’eba, ema balun tuda fali ami nia kareta tanba ne’e mak ami dala ruma para e dala ruma la para,” Kondutor Sarmento katak.
Preokupasaun hanesan hato’o husi Kondutor bis Lelena, Adino katak sira labele liu husi Fatuahi tanba kondisaun estrada la favoravel.
‘Ami prontu atu ba para iha terminal Becora, maibe Governu tenke hadia terminal no estrada Fatuahi nian ne’ebe to’o agora seidauk diak,” sujere Kondutor Adino.
Entretantu hatan ba kestaun ne’e, Staf Senior Traffic Diresaun Nasional Transportes e Terestre (DNTT), Joao Eugenio C.da Silva katak, la’os tanba kondisaun estrada Fatuahi mak at maibe kondutor sira mak hakarak para iha Lesidere.
“Ami nia petugas mos agora la iha ne’eba ona,iha dia 18 fulan Junu dada hotu sira mai, tanba ema deskonesidu ameasa ami nia staf sira ne’eba dehan, imi haka’as ami terminal Becora deit maibe Terminal Tasi-tolu,Terminal Taibesi sira halai to’o mai laran nusa mak imi haka’as ami deit,” dehan Staf da Silva.
Kona ba kestaun ne’e nia parte hato’o karta ida ba iha sira nia Diretor oinsa mak atu toma atensaun ba problema maibe to’o agora seidauk iha rezultadu.
“Ami agora la interven ona bis sira ne’e, maibe sira rasik mak tenke iha konsiensia,” Staf da Silva tenik.
