Fundasaun Mahein (FM) rekomenda ba Parlamentu foun atu kria lei Memorandum of Understanding (MoU) ida kona ba koperasaun servisu Polisia Nasional Timor-Leste (PNTL) no Forsa Defeza Timor-Leste (F-FDTL) ho nasaun seluk, liu-liu nasaun vizinhu sira.
“Ita iha ona koperasaun bilaterais ho nasaun seluk, liu-liu nasaun vizinhu, maibe ita seidauk iha akordu ida ne’ebe maka formal ne’ebe aprova husi Parlamentu Nasional,” dehan Koordenador FM . Joao Almeida Fernandes, (29/06), iha Balide, Dili.
Tuir nia, MoU ne’e importante tanba bele hatene oinsa kooperasaun PNTL no F-FDTL ho nasaun seluk, tanba ne’e Parlamentu foun tenke tau atensaun ba kestaun ne’e.
Entertantu Prezidente Komisaun B Parlamentar, Duarte Nunes, dehan la presiza halo MoU tanba asuntu ida ne’e iha ona lei seguransa nian.
“Buat ne’e iha ona iha lei seguransa nian, ne’e duni labele halo tan MoU, governu mak tenke hare dalan ne’ebe diak para halo kooperasaun nasaun ho nasaun, agora ita iha apoiu espesialista iha area seguransa nian ne’e liu husi ONU,” dehan Prezidente Komisaun B ne’e.
