Vitima ZN tenke simu konsekuensia han tuku loron kalan husi nia la’en LO ne’ebe diskunfia dor, maske iha realidade vitima la halo sala ne’ebe arguidu du’un ba nia. Kazu ho numeru prosesu 0301/11 ne’e halo primeira julgamentu iha Tribunal Distrital Dili (TDD), iha dia 28 Junu 2012.
Tuir vitima ZN, nia sempre hetan baku husi arguidu LO ne’ebe diskunfia ZN ho mane seluk. “ baku hau nia hasan sira ne’e, tuku hau nia kabun, uja besi baku kona hau nia ain, e wainhira nia baku hau ne’e sempre ho kondisaun lanu,” deklara Vitima ZN, (28/06), iha Tribunal Distrital Dili (TDD), Mandarin , Dili.
Arguidu sempre diskunfia vitima katak nia (ZN) selingkuh ho mane seluk iha uma, wainhira arguidu ba servisu.
“Hau sempre esplika katak hau ne’e o nia ferik oan, hau la hanoin atu halo buat at ne’ebe maka o hanoin mai hau ne’e,” dehan Vitima ZN.
Vitima konta, arguidu mos bandu nia atu labele tur iha uma oin, no labele koalia ho ema seluk kuandu arguidu laiha uma.
“Nia hakarak hau iha uma laran deit, hau labele koalia ho labarik mane sira ne’ebe maka ami nia vizinhu, kuandu hau koalia ho mane kois deit, nia dehan hau ne’e selingkuh tiha ho mane ne’e ona,” konta vitima ne’e.
Entertantu Arguidu LO iha nia deklarasaun rekonese katak, nia baku vitima be-beik tanba diskunfia.
“Hau diskunfia nia be-beik tanba iha influensia husi hau nia kolega no familia, ne’ebe maka la gosta hau nia ferik oan, e hau mos fiar deit, ne’e duni kuandu hau hanoin fali ema nia liafuan ne’e hau hakarak baku hela deit nia,” Arguidu ne’e deklara.
Ho akontesementu ne’e, vitima tenke halai ba nia inan-aman no abandona tiha oan sira no halo arguidu nervouzu liu tan.
“Nia sempre halai ba nia inan-aman, no abandona labarik sira iha uma, agora dadaun labarik sira ne’e hela ho hau, nia la tau matan,” dehan Arguidu LO.
Entretantu julgamentu ne’e rasik diriji husi Juis uniku, Juis Duarte tilman, Reprezentante husi Ministeriu Publiku Prokurador Hipolito Santa, no Arguidu hetan Defeza husi Advogadu Manuel Exposto.
Hafoin rona tia deklarasaun Arguidu no Vitima, Tribunal deside, Arguidu sei fila fali mai tribunal hodi rona desizaun ikus iha dia 10 Julhu 2012, tuku 02:00 lokraik.
