Total kazu ne’ebe mak hetan nia finalidade iha Tribunal Distrital sira (Tribunal Distrital Baucau, Tribunal Distrital Oe-Cusse, Tribunal Distrital Suai no Tribunal Distrital Dili) durante tinan 2011 hamutuk 450 kazus.
“Ami konsege rejista kazu ne’ebe tama iha tribunal sira iha distritu hat ne’e hamutuk 450, no julagamentu ba kazu hirak ne’e la’o ho diak,” dehan Diretor Ezekutivu Programa Monitorizsaun ba Sistema Judisial (JSMP), Luis de Oliveira Sampaio, (29/06), iha Colmera, Dili.
450 kazus ne’e mak hanesan kazu Krimi, Sivil, Violensia Domestika, Insestu no kazu sira seluk tan, Diretor JSMP ne’e informa.
Entertantu Prezidente Komisaun B Parlamentar, Deputadu Duarte Nunes, apresia ho servisu JSMP nian hodi halo monitorizasaun ba area justisa durante ne’e.
“Kona ba kazu sira ne’ebe maka barak ne’e, hatudu duni katak ita nia komunidade sira ne’e, komesa iha ona konfiansa ba tribunal ou justisa rai laran, e komunidade sira ne’ebe maka iha problema sira hato’o mai tribunal,” Deputadu ne’e tenik.
Deputadu ne’e rekonese katak, kazu sira ne’ebe tama ona iha tribunal, sempre kleur halo prosesa, tanba ne’e husu ba komunidade sira atu pasiensia hodi hein julgamentu ba kazu ne’e.
