“Halo komunidade sira konfuzaun deit,” hateten Diretora Saude Komunitaria, Isabel Gomes, (11/06), iha konferensia imprensa, iha Hotel Vilaverde, Dili.
Tuir Diretora Gomes, organizasaun laiha kompetensia atu publika dadus HIV/SIDA, maibe ne’e kompetensia Ministeriu Saude nian.
“Komesa agora ba oin, organizasaun internasionais no local sira, ami sei la autoriza atu publika dadus HIV/SIDA maibe sei relata husi Ministeriu Saúde kolabora ho Komisaun Nasional Luta Hasoru HIV/SIDA, fulan tolu dala ida liu husi jornal, televizaun no website ministeriu no komisaun nian,” dehan Diretora Gomes.
Diretora ne’e hatutan, MS sei esforsu nafatin atu kombate virus HIV/SIDA ne’ebe komesa buras iha rai laran, liu husi planu estratejia MS nian, hanesan estabelese fatin Voluntir Aconsiliamentu Teste (VCT) iha 13 distritus, no kopera ho parseiru sira halo advokasia hodi hasa’e konesementu ba komunidade sira.
Enkuantu dadus HIV/SIDA hahu husi 2003 to’o agora hamutuk 273 pesoas, kompostu husi mane nain 138 no 135 feto, e husi numeru ne’e nain 30 mate ona no nain 57 hala’o hela tratamentu antiretroviral, nune’e bele hanaruk sira nia vida moris no hamenus virus HIV iha sira nia isin.
Iha fatin hanesan Vise Prezidente Komisaun Nasional Luta Hasoru HIV/SIDA (KNLHS), Aguia Belo Ximenes konkorda ho ministerio saúde katak dadus tenke mai husi Servisu Informasaun Saúde (SIS) tanba moras HIV/SIDA relasiona ho dignidade ema ida-idak ninian no labele halo komunidade sira konfuzaun ba dadus ne’ebe iha.
“Hau hanoin atu dezenvolve planu sira ne’ebe iha la ses husi dadus no informasaun sira sai husi servisu informasaun saúde iha ministerio saúde tanba liu huis dadu mak it abele dezenvolve programa ne’ebe iha,” dehan Vise Ximenes.
Tuir nia, papel KNLHS nian mak atu halo advokasia no asiste rekomendasaun no halo monitorizasaun ba planu estratejia governu nian, atu kombate virus HIV/SIDA iha rai laran.
