Atu labele akontese violensia iha eskola entre estudante no mestre sira, Organizasaun Timor-Leste Coalition for Education (TLCE) husu ba Profesores sira iha Timor laran tomak, atu eduka alunus sira ho maneira persuasive wainhira sira nakar.
“Iha edukasaun ne’e buat ida ita bolu persuasive, labele violensia total,kuandu violensia total ne’e ita tama ona jero toleransia (buat hotu-hotu tenki uja violensia mak sai diak),” hateten David Kordenador Nasional TLCE, Bendito da Silva, (12/06), iha Kaikoli, Dili.
Tuir Kordenador ne’e, agora la’os ona tempu profesores sira hanorin alunus sira ho violensia, maibe presiza halo aprosimasaun ho sira.
Entertantu Diretor Eskola Ensino Baziku Kaikoli, Abilio Pereira da Conceicao katak, iha nia eskola fatin sira nunka baku alunus sira, tanba profesores sira ne’ebe hanorin iha ne’e, iha komprensaun hotu.
“Profesores sira iha ne’e mesak ferik no katuas hotu, ne’ebe iha ami nia eskola la baku alunus sira,” hatete Diretor da Conceicao.
Tuir nia, kona ba iha eskola balun ne’ebe profesores sira baku tanba alunus sira beik, maibe lolos la’os labarik mak beik maibe profesores sira mak tenke hatene meius, oinsa para labarik sira ne’e hatene.
“ita ema moris mai matenek nanis, so ke ita profesores sira tenke hakbesik ba sira ne’ebe ladun hatene, atu sir abele hatene, la’os ho kekerasan ne’ebe halo labarik beik liu tan,” Diretor ne’e dehan.
Tanba ne’e nia hatutan, kuandu profesores sira uza maneira violensia hodi hanorin alunus sira, ne’e kontra labarik sira nia direitu atu aprende buat ruma iha eskola.
Iha sorin seluk Asistente Protesaun Programa ba Labarik iha Forum Tau Matan (FTM), Honorio Soares Almeida, hateten, Ministeriu Edukasaun mak iha kompetensia atu implementa lei toloeransia iha eskola, hodi komunika ba labarik sira atu asegura labarik sira tuir prosesu aprendizajen ho livre, no prevene labele hetan presaun psikolojia.
Tuir rezultadu estudu ne’ebe Organizasau Non Governmental (NGO), liu-liu organizasaun ne’ebe fo protesaun ba labarik to’o agora sei deskobre katak, violensia profesores hasoru labarik sira sei kontinua aas.
“Se violensia kontinua akontese nafatin ba labarik sira, ne’e signifika katak, ita laiha interese atu asegura labarik sira nia aprendizajen,” Asistente ne’e duvida.
Nia dehan , politika jero toleransia ne’ebe Ministeriu Edukasaun kria, la susesu iha implementasaun tanba profesor sira kontinua uza maneira violensia hodi hasoru alunus sira.
Entretantu tuir Adjuntu Provedoria Direitus Humanus e Justisa (PDHJ), Silverio Pinto katak, inan-aman barak mak hato’o keixa ba iha PDHJ kona ba attitude profesores sira iha eskola, e kazu balun submete ona ba prosesu investigasaun.
“Kazu balun ami hato’o ona ba iha Ministeriu Publiku atu halo investrigasaun klean,” hateten Adjuntu Pinto.
