Atu hatene no hare besik liu tan servisu Uma Hakmatek PRADET nian, liu-liu fo konsellu ba vitima violensia domestika, vitima asaltu seksual, abuzu ba labarik no feto foinsa’e sira, Governadora Australia nia Quentin Bryce halo vizita direitamente ba fatin ne’e no halo komunikasaun ho vitima sira. Governo Australia liu hosi nia Ajensia Dezenvolvimeto AusAID mos doador ida ba PRADET.
“Nia mai halo vizita tanba nia atu hare direitamente valor husi fundus ne’ebe sira fo ba ami atu hala’o programa asistensia ba vitima, e espera katak ho asistensia ne’ebe ami halo durante ne’e ba vitima sira, bele hetan resposta positive husi sira, nune’e iha futuru sira bele kontinua fo apoiu ba ami,” esperansa Kordenadora Uma Hakmatek, Luisa Marcal (28/05) iha Hotel Arbiru, Bebonuk, Dili.
Kordenadora Marcal dehan, kada fulan sira fo asistensia forensic ba vitima violensia domestika, seksual kuaze ema 20 resin husi distritus sira.
PRADET mos iha ona planu atu estabelese Uma Hakmatek ba vitima sira iha Ospital Referral lima, e iha Distritu Oe-Cusse estabelese no funsiona ona, Suai iha ona faze rekrutamentu funsionario inklui mos fasilidade, no ida seluk iha Maliana ne’ebe sei iha prosesu konstrusaun.
Iha parte seluk Sekretaria Estadu Promosaun Igualidade (SEPI), Idelta Maria Rodrigues, apresia ba servisu ne’ebe organizasaun PRADET halo durante ne’e, liu-liu fo asistensia forensic ba vitima no fo konseling.
“Hau apresia mos ba PRADET nia servisu ne’ebe durante ne’e halo, hanesan kapasitasaun ba mediku Timoroan sira, tanba uluk ita atu halo ezaminasaun forensic depende deit ba mediku estranjeiru maibe agora Timor oan rasik mak halo ezaminasaun hanesan iha su-distritu Maubise, Oe-Cusse, Suai no Dili ita iha ona mediku,” apresia SE Rodrigues.
Alende organizasaun PRADET nia mos apresia ho servisu Forum Komunikasi Perempuan Timor Lorosa’e (FOKUPERS), Vitim Support Service (VSS) ne’ebe durante ne’e fo asistensia legal ba vitima violensia domestika, seksual no seluk tan.
