Hafoin Sekretariadu Tekniku Administrasaun Eleitoral (STAE) hahu loke resenseamentu eleitoral iha dia 02 to’o 18 Maiu 2012, oras ne’e dadaun eleitores nain 13.200 mak konsege muda ona sira nia kartaun eleitoral, enkuantu nain 12.500 halo kartaun eleitoral foun.
“Total sira ne’ebe muda no troka kartaun eleitoral hamutuk 13.200 i tal no ba sira ne’ebe kompleta idade 17 anos halo kartaun eleitoral foun hamutuk 12.500,
atu nune’e komunidade sir abele partisipa diak liu tan iha eleisaun parlamentar fulan oin mai ne’e,” hateten Adjuntu Sekretariadu Tekniku Administrasaun Eleitoral (STAE), Manuel Branco, (05/06), iha Kaikoli, Dili.
Tuir nia, numeru ne’e foin iha distritu Dili nian deit, e husi distritu 12 nian seidauk hatene, tanba iha problema tekniku ba sistema rede servisu iha STAE distrital. “Ne’e duni ita seidauk hatene lolos numeru ne’ebe maka klaru,” dehan Adjuntu Branco.
Entertantu Membru Parlamentu Nasional, Deputada Fernanda Lay, konkorda tebes ho politika STAE nian hodi loke resenseamentu ba sidadaun sira ne’ebe hakarak muda sira nia kartaun eleitoral, nune’e sira bele ezerse sira nia direitu iha eleisaun agora.
“Ne’e nudar dalan ne’ebe maka kapas no diak, no prosesu ne’e simples ema hotu bele iha oportunidade, kuandu laiha politika hanesan ne’e komplikadu tanba iha eleisaun prezidensial iha kritika barak no ema barak mak la vota,” Deputada Lay apresia.
Tuir nia, ho total eleitores foun ne’ebe maka barak ne’e, hatudu katak povu Timor-Leste antusiasmu tebes atu tuir eleisaun.
